دادگای باڵای فیدراڵی عێراق داوای سکاڵاکارانی لەسەر یاسای بە پارێزگابوونی هەڵەبجە ڕەتکردەوە

ئاڤا نیوز

بەپێی نوسراوێک کە دەست ئاڤا کەوتووە، لە 6ـی ئایاری 2025، دادگای باڵای فیدراڵی عێراق، بە سەرۆکایەتی دادوەر جاسم محەممەد عبود، بڕیارێکی دەرکرد کە تێیدا داواکاری چەند پەرلەمانتارێکی عێراقی ڕەتکردەوە کە تانەیان دابوو لەیاساییبوونی دەنگدان لەسەر پڕۆژەیاسای بەپارێزگابوونی هەڵەبجە.

چیرۆکی سەرەکی: هەڵەبجە وەک نۆزدەیەمین پارێزگای عێراق لە دوای دەنگدانێک لە پەرلەمانی عێراق لە 14ـی نیسانی 2025 بە فەرمی ناسێنرا. هەندێک لە پەرلەمانتاران ناڕەزاییان دەربڕی، بە بیانووی ئەوەی کە نیسابی یاسایی پەرلەمان لە کاتی دەنگدان لەسەر پڕۆژەیاساکە تەواو نەبووە.

لێدوانی فەرمی: نوخشە ناسیح، پارێزگاری هەڵەبجە بەوەکالەت بە ئاڤا میدیای ڕاگەیاند" من وەکو کەسێکی یاسایی هیچ لێدوانێک لەوبارەیەوە نادەم، چوونکە هێشتا دۆسیەکە ماوە یەکلایی ببێتەوە".

ئەوەی پێویستە بیزانیت: ڕەتکردنەوەی داواکارییەکە لەلایەن دادگای باڵای فیدراڵییەوە ڕێگە دەدات بە بەردەوامبوونی پڕۆسەی دامەزراندنی هەڵەبجە وەک پارێزگا، لەکاتێکدا کە داوا دەستوورییە سەرەکییەکە هێشتا لەژێر لێکۆڵینەوەدایە.