دەزگای مین دەڤەری باڵەکایەتی لە دەنگێکی گەورە ئاگادار دەکاتەوە

ئاڤا نیوز

دەزگای مین دانیشتوانی چەند ناوچەیەک لە دەڤەری باڵەکایەتی سنووری ئیدارەی سەربەخۆی سۆران ئاگادار دەکاتەوە، سبەی بەهۆی لەناوبردنی ژمارەیەک مین لە چالاکییەکی نزیک چیای بەردەبووک دەنگێکی گەورە دێت و مەترسی نییە.

وێنە گەورەکە: لەماوەی نیو سەدەی ڕابردوودا ڕژێمە یەک لەدوای یەکەکانی ڕابردووی عێراق، ڕووبەرێکی بەرفراوانی خاکی کوردستانیان مینڕێژ کرد، بەشێک لەو مینانەی سبەی دەتەقێنرێنەوە لە کێڵگە مینەکان هەڵگیراونەتەوە.

لێدوانی فەرمی: موخلیس شەریف، سەرۆکی تیم لە بەڕێوەبەرایەتی گشتی دەزگای مین لە سۆران بە ئاڤا میدیای وت، وا بڕیارە بە سێ قۆناغ لەماوەی ئەم هەفتەیە و هەفتەی داهاتوو 14 هەزار پارچە مین بتەقێنرێنەوە، بەو هۆیەوە لە هەریەکە لە ناوچەکانی قەزای چۆمان، ناحیەی گەڵاڵە و سمیلان دەنگی دەبیسترێت و هیچ مەترسی نییە.

زانیاریی زیاتر: ئەو تەقەمەنیانە بەشێکیان لە ناوچە مینڕێژکراوەکانی کوردستان کۆکراونەتەوە، بەشێکی دیکەیان لەگەڵ ئەو ترێڵە پڕ ئاسنانە هێنراون کە لە ناوچەکانی موسڵ و ناوەڕاست و خوارووی عێراق کۆکراونەتەوە و بۆ کارگەکانی شیش هێنراونەتە هەرێمی کوردستان، بەڵام پێیان زانراوە و تەسلیمی دەزگای مین کراون.