ڕووسیا و ئۆکراینا لەسەر ئازادکردنی دیلەکانیان ڕێککەوتن

ئاڤا نیوز

لە شاری ئەستەنبووڵی تورکیا، ڕووسیا و ئۆکراینا لەسەر ئاڵوگۆڕکردنی دیلەکانی جەنگی نێوانیان ڕێککەوتن.

وێنە گەورەکە: بە نێوەندگیری تورکیا و بە ئامادەبوونی هاکان فیدان وەزیری دەرەوەی ئەو وڵاتە، ڕووسیا و ئۆکراینا بەشێوەیەکی ڕاستەوخۆ دانوستانەکانیان دەستپێکرد بۆ ڕاگەیاندنی ئاگربەست.

زانیاریی زیاتر: لە ئەستەنبوڵ شاندی ئۆکراینا بە سەرۆکایەتی ڕوستێم ئومێرۆڤ وەزیری بەرگری ئەو وڵاتە لە بەرامبەر تیمێکی ئاست نزمی ڕووسیا دانیشتبوون کە ڤلادیمێر مێدینسکی، یاریدەدەری سەرۆکایەتی ڕووسیا سەرپەرشتی دەکرد.

لێدوانە فەرمییەکان:

هاکان فیدان وەزیری دەرەوەی تورکیا ڕایگەیاند: داوا دەکەم ڕووسیا و ئۆکراینا ئەم دەرفەتە بقۆزنەوە و لە زووترین کاتدا ئاگربەست ڕابگەیەنن.

ڤلادیمێر مێدینسکی، سەرۆکی شاندی ڕووسیا ڕایگەیاند: ڕووسیا و ئۆکراینا ڕێککەوتن لەسەر ئەوەی پێشنیازی ورد بۆ ئاگربەست پێشکەش بە یەکتر بکەن و هەردوولاش هەزار دیلی جەنگ ئاڵوگۆڕبکەن.

ڕوستێم ئومێرۆڤ، وەزیری بەرگری ئۆکراینا ڕایگەیاند: کۆبوونەوەکەمان تەواوکرد، ئەو کارنامەیەی دراوەتە ڕووسیا یەکەم بریتی بووە لە ئاگربەست، دووەمیان کردنەوەی ڕێڕەوی مرۆیی و ئاڵوگۆڕی دیلەکان، سێیەمیش کۆبوونەوەی ڤلادیمێر پووتین ڕاستەوخۆ لەگەڵ ڤۆلۆدیمێر زێلێنسکی، سەرۆکی ئۆکراینا بۆ گفتوگۆکردن لەسەر ئاگربەست.

ئەوەی پێویستە بیزانیت: ئاڵوگۆڕپێکردنی دیلەکان بەو شێوەیە دەبێتە گەورەترین گۆڕینەوەی دیلەکانیان لە سەرەتای دەستپێکردنی جەنگەوە لە ساڵی 2022.

لەلایەکی دیکەوە: کیێڤ کرێملین تۆمەتبار دەکات بە هێنانەکایەی داواکاری قبوڵنەکراوی نوێ بۆ کشانەوەی هێزەکانی ئۆکراینا لە ناوچەیەکی بەرفراوان.

ئەوەی لەبارەیەوە دەگوترێت: هەردوو وڵات لەم هەفتەیەدا خەریکی مانۆڕی دیپلۆماسی بوون لەکاتێکدا هەوڵیاندا نیشانی ترەمپی بدەن کە بە تامەزرۆییەوە دانوستان دەکەن، هەرچەندە ناوبراو بێزاری خۆی دەربڕیوە لەوەی دانوستانەکان بە خاوی بەرەوپێش دەچن و هەڕەشەی سزادانی بەسەر ڕووسیا و كشانەوە لە هاوپەیمانی ئۆکراینا کرد.