کەشناسیی عێراق: خۆڵبارین دەستپێدەکاتەوە و پلەکانی گەرماش بەرز دەبنەوە

ئاڤا نیوز

 

دەستەی کەشناسیی عێراق ڕایدەگەیێنێت، ڕۆژانی داهاتوو خۆڵبارین دەستپێدەکاتەوە و پلەکانی گەرماش بەرز دەبنەوە بە تایبەتی لە پارێزگاکانی باشووری وڵات.

 

ڕاگەیێنراوی فەرمی: دەستەی کەشناسیی عێراق لە ڕاگەیێنراوێکدا ڕایگەیاند: لە ڕۆژانی داهاتوو تاوەکو ڕۆژی پێنجشەممە پلەکانی گەرما لە پارێزگاکانی باشوور بۆ سەرووی 40 پلەی سیلیزی بەرز دەبنەوە، هاوکات خۆڵبارین دەستپێدەکات بە تایبەتی لە ناوچەکانی ڕۆژئاوا، ناوەڕاست و باشووری عێراق، مەوداوی بینینیش لە نێوان سێ بۆ پێنج کیلۆمەتر دەبێت.

 

لێدوانی فەرمی: شێخ دارا، شارەزا و پێشکەشکاری کەشوهەوای ئاڤا لە هەواڵەکانی کاتژمێر حەوتی ئاڤا کە هەوراز گوڵپی پێشکەشی دەکات، ڕایگەیاند: خۆڵبارین لە عێراق زۆرە بەڵام لە هەرێمی کوردستان بەدیاریکراوی لە پارێزگاکانی هەولێر و دهۆک کەمترە، لە پارێزگای سلێمانی بەهۆی با، خۆڵبارین نەماوە. گوتیشی، ڕۆژی یەکشەممە خۆڵبارینەکە لە هەرێمی کوردستان لاوازتر دەبێت.

 

ئەوەی پێویستە بیزانیت: بە گوێرەی دەستەکە، ڕۆژی پێنجشەممە، خۆڵبارینەکە بەردەوام دەبێت بەڵام پلەکانی گەرما نزم دەبنەوە.