لە هەولێر بەهۆی پێنەدانی جەژنانە زبڵ و خاشاکی ماڵان جێدەهێڵدرێت

ئاڤا نیوز

بەشێك لە هاووڵاتیان لەڕێگەی ئاڤاوە گلەیی دەگەیەننە لایەنی پەیوەندیدار كە بەهۆی ئەوەی پارەی جەژنانەیان بە كارمەندانی شارەوانی نەداوە، چەند ڕۆژێكە زبڵ و خاشاكی بەردەم ماڵەكانیان جێهێلدراوە. قایمقامی قەزای ناوەندیی هەولێریش تایبەت بە ئاڤا ڕایگەیاند، ئەگەر هەر گەڕەکێک بەم هۆکارە زبڵ و خاشاکەکەی جێهێڵدرابوو، با لیژنەكانی سەر بە قایمقامیەت ئاگاداربكاتەوە و لەنزیكترین كاتدا كۆمپانیاكانی كۆكردنەوەی زبڵ و خاشاك پابەند دەكرێن بە لابردنی پاشماوەی ماڵان.

وێنە گەورەكە: ساڵانە بەر لە هاتنی جەژنەكان، كارمەندانی كۆمپانیاكانی پاككردنەوە و كۆكردنەوەی زبڵ و خاشاك بەتایبەت كارمەندە بیانییەكان، وەك نەریتێك هەڵدەستن بە كۆكردنەوەی پارەی جەژنانە لەنێو كۆڵان و گەڕەكەكان.

لێدوانی فەرمی: نەبەز عەبدولحەمید، قایمقامی قەزای ناوەندیی هەولێر تایبەت بە ئاڤا ڕایگەیاند، كۆمپانیاكانی كۆكردنەوەی زبڵ و خاشاك بەردەوام لەلایەن بەڕێوەبەرایەتیی خزمەتگوزاری و ژینگەپارێزی سەر بە سەرۆکایەتیی شارەوانی هەولێر چاودێری دەكرێن، هیچ كارمەندێكیش بۆی نییە داوای جەژنانە بكات، بەڵام ئەو بابەتە وەك نەریتێكی لێهاتووە.

داواش لە هاووڵاتیان دەكات، ئەگەر لە هەر گەڕەكێك زبڵ و خاشاك بەهۆی پێنەدانی جەژنانە جیهێڵدرا، بەزووترین كات لیژنەكانی قایمقامیەت ئاگادار بكەنەوە، "ئێمەش دوای بەدواداچوون، كۆمپانیاكانی زبڵ و خاشاك پابەند دەكەین بە خاوێنكردنەوەی ئەو كۆڵان و شوێنانەی كە بەئەنقەست و بەهۆی نەدانی پارەی جەژنانە، جێهێڵدراون".

لەلایەكی دیكەوە: بەڕێوەبەرایەتیی خزمەتگوزاری و ژینگەپارێزی لە ڕوونکردنەوەیەکدا دووپاتی دەكاتەوە كە پێدانی جەژنانە بە كرێكاران، تەواو ئارەزوومەندانەیە و هیچ هاووڵاتیەك ناچار نییە هیچ بڕە پارەیەک بەناوی جەژنانە یان بە هەر ناوێکی دیكە بدات. هەر ڕەفتارێکی نەشیاو لەلایەن کرێکاران و کارمەندانی کۆکردنەوەی خاشاک بەرامبەر هاووڵاتیان بكرێت لە نموونەی: (بەزۆر پارەوەرگرتن، دیاریکردنی بڕەکەی، دانانی نیشانە لەسەر دەرگا و حاویەی ماڵان، یاخود جێهێشتنی تەنەكەی خۆڵ) ئەوا لەڕێگەی لیژنەكانی قایمقامیەتەوە، بەڕێوەبەرایەتییەكەمان ئاگادار بكەنەوە بۆ گرتنەبەر ڕێكاری پێویست.

هاوکات، بەڕێوەبەرایەتیی خزمەتگوزاری و ژینگەپارێزی، هاووڵاتیان ئاگادار دەكاتەوە لەوەی كەسانێكی سواڵکەر بەناوی کرێکارانی شارەوانییەوە پێش جەژنان لەناو کۆڵانەکان دەگەڕێن بۆ جەژنانە، "ئێمە وەکو بەڕێوەبەرایەتیی خزمەتگوزاری و ژینگەپارێزی هیچ پەیوەندیمان پێیانەوە نییە، هاووڵاتیان ئەگەر نیازی هاوکاری یان جەژنانەیان هەیە بە کرێکارانی شارەوانی، ئەوە بیدەن بەو کرێکارانەی کە ئۆتۆمبێلی کۆکردنەوەی خاشاکیان لەگەڵدایە".