توێژینەوەیەک: کابۆیەک و تیشێرتێک بکڕە و 20 هەزار دەبە ئاو پاشەکەوت بکە

ئاڤا نیوز

 

ساڵانە لەسەر ئاستی جیهان پیشەسازیی دروستکردنی جلوبەرگ 93 ملیار مەتری چوارگۆشە ئاو بەکار دەهێنرێت – ئەم بڕە هێندەی 37 ملیۆن حەوزی مەلەی ئۆڵۆمپیادە. جگە لەمە، بە هۆی پیشەسازیی جلوبەرگەوە ڕێژەیەکی زۆر لە سەرچاوە سرووشتییەکانی دیکەش بەکار دەهێنرێن و بڕێکی زۆریش زبڵ درووست دەبێت.

 

بۆچی گرنگە: بەگوێرەی توێژینەوەیەکی دامەزراوەی نێودەوڵەتیی 'ئۆکسفام' تەنیا بە کڕینی کابۆ و تیشێرتێکی دەستی دوو، دەتوانرێت هێندەی 20 هەزار دەبە ئاو پاشەکەوت بکرێت و بەمەش لێکەوتە نەرێنییەکانی پیشەسازیی دروستکردنی جلوبەرگ کەم بکرێتەوە.

 

بەگوێرەی بەدواداچوونەکانی ئۆکسفام، بۆ بەرهەمهێنانی تیشێرتێکی لۆکە، هێندەی 5 هەزار و 400 دەبە ئاوی 500 ملیلیتری ئاو پێویستە کە ئەم بڕە ئاوە پێداویستیی ڕۆژێکی هەزار و 600 کەس دابین دەکات.

 

زانیاریی زیاتر: هاوکات، بڕی ئاوی پێویست بۆ بەرهەمهێنانی کابۆیەک، هێندەی 16 هەزار دەبە ئاوی ستاندارە کە ئەم بڕە بەشی تێرئاوکردنی ڕۆژێکی 4 هەزار و 750 کەس دەکات.

 

ئەوەی پێویستە بیزانیت: ئۆکسفام لە ساڵی 2019ـەوە کەمپەینێکی بە ناوی 'دەستی دوو لە سێپتەمبەر' دەستپێكردووە و ئامانجی ئەوەیە هانی خەڵک بدات جلوبەرگەکانیان زیاتر بەکار بهێنن، جلوبەرگەکانی خۆیان ببەخشن بە کەسانی دیکە یان جلوبەرگی دەستی دوو بکڕن تا لەم ڕێگەیەوە خواست لەسەر جلوبەرگی نوێ کەم ببێتەوە و کۆمپانیاکانیش جلوبەرگی کەمتر بەرهەم بهێنن و ئاوی کەمتریش لە پیشەسازیی جلوبەرگدا بەکار ببرێت، بەمەش کاریگەرییە نەرێنییەکان لەسەر ژینگە و زەوی کەم بکرێتەوە.