کەشناسی: لەگەڵ بەرزبوونەوەی پلەکانی گەرما ئەگەری تاوە باران هەیە

ئاڤا نیوز

 

بەڕێوەبەرایەتیی کەشناسی و بومەلەرزەزانی هەرێمی کوردستان ڕایگەیاند، پلەی گەرما بەراورد بە ڕۆژی یەکشەممە بەرز دەبێتەوە و ئەگەری تاوەبارانیش هەیە لە ناوچە شاخاوییەکانی باکوور و باکووری رۆژهەڵاتی هەرێمی کوردستان. 

 

وێنە گەورەکە: ساڵ دوای ساڵ پلەکانی گەرمی بەرز دەبنەوە و زەوی گەرمتر دەبێت، بۆیە بەردەوام دەزگا ژینگەییەکانی جیهان هۆشیاری دەدەن لەوەی پێویستە ڕووبەڕووی ئەم دۆخە ببنەوە. زۆربەی وڵاتانیش کۆکن لەسەر ئەوەی دەبێت پلانێکی گونجاو بۆ ڕێگریکردن لە بەرزبوونەوەی پلەی گەرما دابنرێت، بەڵام مانگی ئایاری ئەمساڵ لە کوردستان بەراورد بە ناوچەکانی دیکەی جیهان، ئامارێکی جیاواز دەردەخات.

 

ڕاگەیێنراوی فەرمی: ئەمڕۆ دووشەممە، بەڕێوەبەرایەتیی گشتی کەشناسی و بومەلەرزەزانی هەرێمی کوردستان پێشبینییەکانی بۆ کەشوهەوای 48 کاتژمێری داهاتوو بڵاوکردەوە و ڕایگەیاند، ئەمڕۆ بەگشتیی ئاسمان لە زۆرینەی ناوچەکان ساماڵ و پەڵە هەور دەبێت، دوای نیوەڕۆ لە هەندێک شوێن دەگۆڕێت بۆ نیمچە هەور و ئەگەری تاوە بارانیش هەیە. 

 

بەڕێوەبەرایەتییەکە ئاماژەی بەوەشداوە، لەگەڵ بەرزبوونەوەی پلەکانی گەرما بە دوو پلە بەراورد بە ڕۆژی ڕابردوو، خێرای با زیاتر دەبێت.

 

لێدوانی فەرمی: شێخ دارا، شارەزا و پێشکەشکاری کەشوهەوای ئاڤا ڕایگەیاند، لەگەڵ بەرزبوونەوەی پلەکانی گەرما لە ڕۆژانی جەژندا پشبینی دەکرێت لە هەندێک لە ناوچە سنوورییەکانی باکووری هەرێمی کوردستان ببارێت، ئەمەش هاوکاتە لەگەڵ زیادبوونی خێرای با. 

 

زانیاریی زیاتر: بەرزترین پلەکانی گەرمای پێشبینیکراو لەماوەی 48 کاتژمێری داهاتوودا بەم شێوەیەیە: 
هەولێر : 39 پلەی سیلیزی، سلێمانی : 37 پلە، دهۆک: 38 پلە، کەرکوک: 44 پلە، زاخۆ: 39 پلە، هەڵەبجە: 38 پلە، سۆران: 37 پلە، حاجی ئۆمەران: 21 پلە، گەرمیان: 45 پلە.