ورد و درشتی نۆژەنكردنەوەی بازاڕی قەیسەری هەولێر بزانە

ئاڤا نیوز

 

دوای زیاتر لە ساڵێک لە بەردەوامی کارەکانی نۆژەنکردنەوەی بازاڕی قەیسەری هەولێر، ڕووکاری ناوەوەی بازاڕەکە و کۆڵانە سەرەکی و لاوەکییەکانی بەپێی ستانداری پاراستنی شوێنە کولتوورییەکان نۆژەنکرایەوە و حەوت ملیار دیناریشی تێچوو.

 

وێنە گەورەکە: شەوی 5ـی ئایاری 2024، دەستى ڕەش و ناحەزانى ئاوەدانى و ئارامى هەولێرى پایتەخت، لەپێناو شێواندنی ئابووری و سەقامگیری هەرێمی کوردستان، گڕیان لە بازاڕی مێژوویی ناوجەرگەی شاری هەولێر بەردا و بەهۆیەوە 227 دوکان و پێنج کۆگا سووتان، دەیان دوکانی دیکەش زیانیان بەرکەوت، ڕۆژێک دوای ڕووداوەکە؛ لە سەر فەرمان و ڕاسپاردەى سەرۆکوەزیران مه‌سرور بارزانی، سه‌رۆکی حکومه‌تی هه‌رێمی کوردستان، لەپاڵ بڕیارى نۆژەنکردنەوەی بازاڕەکە، بڕیاری هاوکاریکردن و یارمەتیدانى دوکاندارانى زیانلێکەوتوو درا.

 

ئەوەی پێویستە بیزانیت: وێڕاى نۆژەنکردنەوەى بازاڕەکە بە گۆژمەى نزیکەى ( 7 ملیار دینار ) لەسەر بودجەى پارێزگاى هەولێر، لە 2024.9.8، دەست بە دابه‌شکردنی هاوکاری سەرۆکى حکومەتى هەرێمى کوردستان کرا بەسەر زیانلێکەوتووانى بازاڕەکە کە بڕی هاوکارییەکە، لە نێوان ( 2 تاکو 20 ملیۆن دینار ) بوو، ئەوە جگە لە بڕیاری لێخۆشبوون بۆ ماوەی یەک ساڵ لە پارەی ئاو و کارەبا و تابلۆ و خاشاک، هەروەها بەخشینیان لە باجی 2023 بە رێژەی 50% و لە باجی 2024ـش بە رێژەی 100% و لێخۆشبوونى یەک ساڵ لە کرێى ساڵانەى ئەو دووکاندارانەى کە کرێچى حکومەتن.

 

چیرۆکی سەرەکی: ئەمڕۆ چوارشەممە 18-6-2025، بازاڕی قەیسەری دوای کۆتاییهاتنی کارەکانی نۆژەنکردنەوەی، بەفەرمی کرایەوە و ڕادەستی خاوەنەکانیان کرایەوە، کە گوژمەی 7 ملیار دینار لە نۆژەنکردنەوەی خەرج کرا، بەجۆرێک لەکاتی نۆژەنکردنەوەی شێوازی ئەندازەیی و ستانداردی پاراستنی شوێنە کولتوورییەکان لەبەرچاو گیراوە. لە مەراسیمی کردنەوەی بازاڕەکە هەریەک لە پارێزگاری هەولێر، جێگری پارێزگار، سەرۆکی شارەوانی هەولێر، قایمقامی قەزای ناوەندیی هەولێر، بەڕێوەبەری پۆلیسی هەولێر و بەڕێوەبەری بەرگریی شارستانیی هەولێر، ئامادەی بوون.

 

لێدوانی ڕۆژنامەوانی: ئومێد خۆشناو، پارێزگاری هەولێر لە کۆنفرانسێکی ڕۆژنامەوانیدا، وێڕای دەستخۆشی لە تیمی ئەندازەی پارێزگا و سەرۆکایەتیی شارەوانی و سەرجەم لایەنەکان و سەرپەرشتیاران و بەڵێندەرانى پڕۆژەکە، لەبەرامبەر ئەنجامدانى کارەکانیان بە ڕێکوپێکى و لەکاتى دیاریکراوى خۆیدا، ڕاشیگەیاند، بەهۆی ڕووداوی ئاگرکەوتنەوەکە زیاتر لە 249 دوکان سووتان و زەرەرمەند بوون.

 

خاڵە ئەرێنییەکان: بازاڕی قەیسەری هەولێر ئێستا بە نوێترین سیستمی سەلامەتی و ئاگرکوژێنەوە و دانانی کامێرای چاودێری نۆژەنکراوەتەوە و سەرجەم پێداویستییەکانی بەرگریی شارستانی بۆ سەلامەتیی هەموو ئەوانەی لە بازاڕەکەدان، دابین کراوە.

- هاوکات دروستکردنی نهۆمی دووەم بۆ بەشی قەیسەری کۆن، جوانی و قەشەنگی بە بازاڕەکە داوە و دیمەنێکی گەشتیاری پێ بەخشیوە.

 

باکگراوند: بازاڕی قەیسەری ھەولێر دەکەوێتە بەرامبەر قەڵای ھەولێر لەناوجەرگەی شارەکە، مێژووی دروستکردنی بازاڕەکە بۆ زیاتر لە 200 ساڵ پێش ئێستا و بۆ سەردەمی حکومڕانیی عوسمانی دەگەرێتەوە. بازاڕی قەیسەری رووبەرەکەی نزیکەی 50 هەزار مەتری چوار گۆشەیە، سەدان دوکانی دیکە هەیە و ڕۆژانەش هەزاران هاووڵاتی سەردانی دەکەن. لە سەرەوەی چەند کونێک ھەن کە لە سەردەمی زوودا بۆ ھەواگۆڕکێ و ڕووناکی بەکارھاتوون. سەردانیکاران بەچەند دەرگایەکەوە دەتوانن بچنە نێو بازاڕەکەوە.