ڕێگە بە هاووڵاتیان نادرێت پایسکیل و سکۆتەر ببەنە پارکی سامی عەبدولڕەحمان

ئاڤا نیوز

ڕێگە بە هاووڵاتیان نادرێت پایسکیل و سکۆتەر ببەنە نێو پارکی سامی عەبدولڕەحمان لە هەولێر و بەڕێوەبەری پارکەکە هۆکارەکەی بۆ ئاڤا میدیا ئاشکرا دەکات.

چیرۆکی سەرەکی: بەشێک لە هاونیشتمانیان گلەیی دەکەن لەوەی ڕێگەیان پێنادرێت پایسکیل و سکۆتەر ببەنە پارکی سامی عەبدولڕەحمان لە هەولێر، ئاڤا میدیا بەدواداچوون بۆ ئەو پرسە دەکات و هۆکارەکەی ئاشکرا دەکات.

لێدوانی فەرمی: جەمیل حوسێن، بەڕێوەبەری پارکی سامی عەبدولڕەحمان بە ئاڤای ڕاگەیاند: ڕۆژانە خەڵکێکی زۆر بۆ پشوودان و بەسەربردنی کاتەکانیان سەردانی پارکەکە دەکەن، بۆیە ناکرێت هەر کەسێک پایسکیل و سکۆتەرێک لەگەڵ خۆی بهێنێت، ئەمە جەنجاڵی دروست دەکات و دەبێتە هۆی ڕووداوی نەخوازراوی وەک شێلانی هاووڵاتیان بە گشتی و منداڵان بە تایبەتی، هەروەها شکانی دارەکانی نێو پارکەکە.

زانیاریی زیاتر: بە گوتەی بەڕێوەبەری پارکی سامی عەبدولڕەحمان، بەپێی پێویستیی پارکەکە ژمارەیەک پایسکیل لەوێ دانراون و گەشتیاران دەتوانن بە کرێی بگرن، هەروەها خاوەنی ئەو پایسکیلانە بەشێوەی گرێبەست لەوێیە و لەکاتی ڕووداوە نەخوازراوەکاندا بەرپرسیاریەتیی تەواوەتی هەڵدەگرێت.

ئەمەش بزانە: پارکی سامی عەبدولڕەحمان گەورەترین پارکی هەولێرە، ڕۆژانە هەزاران کەس ڕووی تێدەکەن، پارکەکە سیمایەکی جوان و دڵگیری بە هەولێر بەخشیوە و کاریگەریی ڕاستەوخۆی لەسەر ژینگەی شارەکە هەیە.