دوو کەس بەتۆمەتی سووتانی پووش و پاوان لە شارەزوور دەستگیر دەکرێن

ئاڤا نیوز

لە سنووری شارەزوور دوو هاووڵاتی، کە هۆکاری سووتاندنی چەند دۆنمێک پوش و پاوان و دارستان بوون دەستگیرکران.

ڕاگەیێنراوی فەرمی: بەڕێوەبەرایەتی پۆلیسی دارستان و ژینگەی پارێزگای سلێمانی ڕایگەیاند: دوو هاووڵاتی عەرەب لەلایەن یاریدەدەرێتی ئاسایشی شارەزوورەوە دەستگیرکراون، کە هۆکاربوون بۆ سووتاندنی نزیکەی دوو دۆنم پوش و پاوان لەگەڵ زیانگەیاندن بە دارستانەکان.

زانیاریی زیاتر: دوای دەستگیرکردنیان دوو کەسەکە ڕادەستی بەشی پۆلیسی دارستان و ژینگەی شارەزوور کراون، هاوکات پەڕاوی لێکۆڵینەوەیان بۆ ڕێکخراوە، بۆ ئەوەی ڕێکاری یاساییان لەلایەن دادوەری لێکۆڵینەوەوە بەرامبەر بگیرێتەبەر.

لێدوانی فەرمی: عەمید هێمن کەمەرخان، بەڕێوەبەری ڕاگەیاندنی پۆلیسی دارستان و ژینگەی پارێزگای سلێمانی، ڕایگەیاند: هەر کەسێک هۆکار بێت بۆ سووتاندن، جا سووتاندنی دۆنم، یان دارستان بێت، بەگوێرەی قەبارەی زیانەکان پێبژاردنی پێ دەکرێت، ئەوەش بە بڕیاری دادگا جێبەجێ دەکرێت.