شوان کەلاری: بە ئەگەری زۆرەوە هەفتەی داهاتوو ڕێککەوتن لەبارەی نەوت و مووچە دەکرێت

ئاڤا نیوز

 

بڕیاردەری فراکسیۆنی پارتی لە پەرلەمانی عێراق بە ئاڤا میدیای وت، لەو دانیشتنانەی لەنێوان شاندی تەکنیکی هەرێمی کوردستان و بەغدا کراوە، لێکتێگەیشتنی باش دروستبووە و بە ئەگەری زۆرەوە لە ناوەڕاستی هەفتەی داهاتوو، ڕێککەوتن لەبارەی هەناردەکردنەوەی نەوت و ناردنی مووچە دەکرێت.

 

وێنە گەورەکە: هەرچەندە لە سەرەتای ساڵ، ڕێککەوتن لەسەر ناردنی تەواوی مووچەی مانگەکانی ئەمساڵ لە نێوان هەردوو حکومەتی هەرێمی کوردستان و عێراق کرا، بەڵام بەغدا پابەندی ڕێککەوتنەکە نەبوو و ماوەی دوو مانگە هیچ بڕە پارەیەکی بۆ مووچە ڕەوانە نەکردووە.

 

لێدوانی فەرمی: شوان کەلاری، بڕیاردەری فراکسیۆنی پارتی دیموکراتی کوردستان لە پەرلەمانی عێراق بە ئاڤا میدیای وت، ئەو دانیشتنانەی کراون ئەرێنی بوون، هەموو هەوڵەکە بۆ ئەوەیە بگەینە ڕێککەوتن، بە تایبەت باسی ئەوە کراوە کۆمپانیا نەوتییەکان ڕازی بکرێن نەوت هەناردە بکەنەوە، تێڕوانینی هەردوولا ئەرێنی بووە و لەیەک نزیکن.

 

شوان کەلاری ئەوەش دەڵێت: کۆمپانیاکانی بواری نەوت دەڵێن پێویستە گرەنتی هەبێت کاتێک ئەو نەوتەی هەناردەی دەکەین کۆمپانیای سۆمۆ شایستەکانمان لە کاتی خۆی بۆ خەرج بکات، کۆمپانیاکان دەترسن شایستەکانیان وەک مووچەی فەرمانبەرانی لێ بێت بۆیە بێ متمانەیی هەیە، بەڵام هەردوولا نزیکن لەوەی ئەمە چارەسەر بکرێت.

 

هاوکات لە ئاستی ناوخۆ و دەرەوەی هەوڵی جددی هەیە بۆ ئەوەی کێشەی مووچەی فەرمانبەران چارەسەر بکرێت. لە ناوەڕاستی هەفتەی داهاتوو بە ئەگەری زۆرەوە ڕێککەوتن، لەبارەی هەناردەکردنەوەی نەوت و ناردنی مووچەی فەرمانبەران دەکرێت.
 
ئەوەی پێویستە بیزانیت: ڕۆژی 25-6 سەرۆکوەزیران مەسرور بارزانی، لە کۆنگرەیەکی ڕۆژنامەنووسی ڕایگەیاند، لەم یەک دوو ڕۆژە شاندێکی بڕیاربەدەستی بەغدا دێتە هەرێمی کوردستان بۆ ڕێککەوتن لەسەر مووچە و هەناردەکردنەوەی نەوت. دوێنێ پێنجشەممە شاندەکە تەكنیكییە گەیشتنە هەولێر و پێكهاتبوون لە نوێنەرانی ئەنجوومەنی باڵای ئابووریی عێراق، بریكاری وەزارەتی نەوتی عێراق، دیوانی چاودێری دارایی عێراق، لەگەڵ نوێنەرانی هەردوو كۆمپانیای سۆمۆ و كۆمپانیای نەوتی باكوور.