لە عێراق پلەکانی گەرما 50 پلەی سیلیزی تێدەپەڕێنن

ئاڤا نیوز

سبەی لە سێ پارێزگای باشووری عێراق، پلەکانی گەرما دەگەنە نیوەی پلەی کوڵان واتە 50 پلەی سیلیزی، شێخ داراش باس لەوە دەکات: ناوەڕاستی ئەم هەفتەیە پلەکانی گەرماش لە هەرێمی کوردستان ڕوو لە نزمبوونەوە دەكەن.

 

وێنە گەورەکە:  25ی حوزەیرانی ئەمساڵ شێخ دارا، شارەزای کەشناسی و پێشکەشکاری کەشوهەوا لە ئاڤا میدیا ڕایگەیاند: هەفتەی ئایندە ئەگەری بەرزبوونەوەی پلەکانی گەرما هەیە و لە پارێزگاکانی هەرێمی کوردستانیش پلەکانی گەرما لە نێوان 44 بۆ 48 پلەی سیلیزی تۆمار دەکرێن.

 

ڕاگەیێنراوی فەرمی: دەستەی کەشوهەوای عێراق بڵاویکردەوە، سبەی لە پارێزگاکانی میسان، بەسرە و زیقار پلەکانی گەرما 50 پلەی سیلیزیی تێدەپەڕێنن، دهۆکیش بە تۆمارکردنی 37 پلە، فێنکترین پارێزگای عێراق دەبێت.

ئەوەی پێویستە بیزانیت: شەپۆلی گەرماکە تا ڕۆژانی یەکشەممە و دووشەممە بەردەوام دەبێت، شێخ داراش باس لەوەدەکات: ناوەڕاستی ئەم هەفتەیە پلەکانی گەرما نزم دەبنەوە بەهۆی کاریگەریی هاتنی شەپۆلێکی جەمسەری باکوورەوە، هاوکات بەهۆی هەڵگەڕانەوەی پلەکانی گەرماش ئەگەری بارانبارین لە مانگی تەممووزدا هەیە.