نەتەنیاهۆ لە واشنتن: گڵۆپی سەوز بۆ هێرشکردنە سەر ئێران لە بەرامبەر نەرمی نواندن لە غەززە

ئاڤا نیوز

 

بەپێی ڕاپۆرتێکی نێودەوڵەتی، سەردانی داهاتووی بنیامین نەتانیاهۆ، سەرۆک وەزیرانی ئیسرائیل، بۆ کۆشکی سپی بە مەبەستی کۆبوونەوە لەگەڵ دۆناڵد ترەمپ، ئامانجی سەرەکیی وەرگرتنی ڕەزامەندیی ئەمریکایە بۆ ئەنجامدانی هێرشێکی سەربازیی نوێ بۆ سەر ئێران.

 

وێنە گەورەکە: نەتانیاهۆ هەوڵدەدات گڵۆپی سەوز بۆ هێرشێکی دیاریکراو و بەئامانجکراو بۆ سەر دامەزراوە ئەتۆمییەکانی ئێران بەدەستبهێنێت، بە مەرجێک نەبێتە هۆی هەڵگیرسانی شەڕێکی فراوانی هەرێمی.

 

لەلایەکی دیکەوە: شارەزایان پێیانوایە کە ئەم داواکارییە بەشێکە لە "مامەڵەیەک"ی سیاسی. لە بەرامبەر ڕەزامەندیی ئەمریکا بۆ هێرشکردنە سەر ئێران، پێشبینی دەکرێت ئیسرائیل هەندێک نەرمی لە کەرتی غەززە بنوێنێت، وەک کشانەوەی بەشێک لە هێزەکانی، ڕێگەدان بە گەیشتنی هاوکارییە مرۆییەکان و ئەنجامدانی ڕێککەوتن بۆ ئازادکردنی دیلەکان.

 

ئەم هەنگاوە لەلایەک فشارەکانی سەر نەتانیاهۆ لە ناوخۆی ئیسرائیل کەمدەکاتەوە و وەک پاڵەوانێک دەریدەخات، لەلایەکی دیکەشەوە دەبێتە دەستکەوتێک بۆ ئیدارەی ترەمپ لە دۆسیەی غەززەدا، بەبێ ئەوەی ئەمریکا ڕاستەوخۆ تێوەبگلێت.

 

جگە لە دۆسیەی ئێران، لە کۆبوونەوەکەدا باس لە وەرگرتنی ڕەزامەندیی ئەمریکا بۆ لکاندنی ناوچەکانی کەناری ڕۆژئاوا و هەوڵەکان بۆ ئاساییکردنەوەی پەیوەندییەکان لەگەڵ وڵاتانی وەک سووریا و لوبنان دەکرێت.

 

ئەم سەردانە لە کاتێکدایە کە نەتەنیاهۆ لە ناوخۆدا ڕووبەڕووی فشاری تووندی ئۆپۆزسیۆن، جەماوەر و تووندڕەوەکان بووەتەوە. هاوکات، ترەمپ دەیەوێت دەستکەوتێکی سیاسی لە ڕۆژهەڵاتی ناوەڕاست بەدەستبهێنێت.

 

شارەزایان ئاماژە بەوە دەکەن کە سەردانەکە چارەسەرێکی ڕیشەیی بۆ کێشەی غەززە ناهێنێت، بەڵکو زیاتر هەنگاوێکی تاکتیکییە بۆ بەڕێوەبردنی قەیرانەکان. نەتەنیاهۆ هەوڵی کاتکوشتن و دواخستنی پرسەکان دەدات، هەرچەندە ئەگەری گۆڕانکاری هەیە، بەڵام دەرکەوتنی ئەنجامە ڕاستەقینەکانی پێویستی بە کات دەبێت.