وەزیری دارایی: هەژماری من پڕۆژەی حکومەتە و ناکرێت بەچاوی حیزبایەتییەوە سەیر بکرێت

ئاڤا نیوز

وەزیری دارایی و ئابووری هەرێمی کوردستان لەبارەی پرۆژەی (هەژماری من) بۆ مووچەخۆران ڕوونکردنەوە دەدات و ڕایدەگەیێنێت، با بە چاوی حیزبایەتی سەیری نەکرێت؛ نە سەوزە، نە زەردە و نە نیلییە، بەڵکو پڕۆژەیەکی گرنگی حکومەتی هەرێمی کوردستانە.

 

وێنە گەورەکە: وەزارەتی دارایی عێراق بۆ بەئەلیکترۆنیکردنی مووچەی مووچەخۆرانی هەرێمی کوردستان نایەوێ پشت بە (هەژماری من) ببەستێ و دەیەوێ لەڕێگەی بانکەکانی سەر بە حکومەتی عێراق هەژماری بانکی بۆ مووچەخۆران بکاتەوە.

 

لێدوانی فەرمی: ئاوات شێخ جەناب، وەزیری دارایی و ئابووری هەرێمی کوردستان لە دیدارێکی ڕۆژنامەوانیدا ڕایگەیاند: "تەوتینی عێراق تەنیا کارتێکە پارەی کاشی پێ ڕادەکێشرێت و هیچ مامەڵەیەکی دیکەی پێناکرێت، بەڵام ئەو سیستەمەی لە هەژماری من کاری پێدەکرێت، تەوتین و 19 خزمەتگوزاری دیکە لەخۆدەگرێت، پێنج بانک بەشدارییان تێدا کردووە کە سەرجەمیان عێراقین و لەلایەن بانکی ناوەندییەوە متمانەیان پێدراوە، بەشێکن لەو 47 بانکەی لە عێراق تەوتین دەکەن."

زانیاریی زیاتر:  هەژماری من لە سەردەمی کابینەی نۆیەمی حکومەتی هەرێمی کوردستان بە ڕەزامەندیی سەرۆکوەزیرانی عێراق و بانکی ناوەندیی عێراق دامەزراوە، لەڕێگەیەوە مووچەخۆر دەتوانێت سوودمەند بێت لە خزمەتگوزارییە بانکییەکان و کارئاسانی زۆریان بۆ دەکرێت، گرنگترینیان دەتوانن سوودمەندبن لە پێشینەکانی خانووبەرە و هاوسەرگیری و پێشینەکانی تر کە بڕەکەیان دەگاتە 150 ملیۆن دینار.

لەلایەکی دیکەوە: وه‌زیری دارایی و ئابووری ئاماژەی بۆ ئەوە کرد ئەگەر هاووڵاتییان و مووچەخۆران بەردەوام بن لە تۆمارکردنی ناویان لە پڕۆژەی هەژماری من، تا سەری ساڵ بەدڵنیاییەوە ئابووری هەرێمی کوردستان دە بەرامبەری ئێستا دەچێتە پێشەوە، چونکە کێشەی نەبوونی پارەی کاش چارەسەر دەکات.

ئەوەی پێویستە بیزانیت: بەگوتەی ئاوات شێخ جه‌ناب، ئەگەر لە ماوەی چەند ساڵی داهاتوودا بەغدا کێشەی پاشکەوتی مووچەخۆرانی هەرێمی کوردستان چارەسەر نەکات، ئەوا دەتوانرێت لەڕێگەی  ئەو پرۆژەیەوە چارەسەر بکرێت، هەروەها هەرێمی کوردستان دەتوانێت تاوەکو پێنج ساڵی دیکە هه‌نگاوی زۆر گه‌وره‌ و پێشكه‌وتوو بنێت.