ڤێرتێرنەری دهۆك بەدواداچوون بۆ لەناوچوونی هەزاران ماسی لە ئاوی بەنداوی مووسڵ دەکات

ئاڤا نیوز

بەڕێوەبەرایەتیی ڤێرتێرنه‌رى‌ دهۆك، به‌دواداچوون بۆ له‌ناوچوونى هه‌زاران ماسی له‌ ئاوى به‌نداوى مووسڵ دەكات، به‌پێی لێكۆڵینه‌وه‌ سه‌ره‌تاییه‌كانی لیژنە تایبەتمەندەكان، ته‌زووى كاره‌با هۆكاری مرداربوونەوەی ئەو ماسییانە بووە.

چیرۆکی سەرەکی: دەریاچەی مووسڵ بەهۆی فراوانییەكەی، بەشێكی كەناراوەكانی جگە لە پارێزگای نەینەوا، كەوتووەتە سەر سنووری پارێزگای دهۆك و ئیدارەی سەربەخۆی زاخۆ، دوای ئاگاداركردنەوەی بەڕێوەبەرایەتیی ڤێتێرنەری دهۆك، بەوەی كە ژمارەیەكی زۆری ماسی لەو دەریاچەیە مردار بوونەتەوە، بەڕێوەبەرایەتییەكە لیژنەیەكی بۆ بەدواداچوونی هۆكارەكەی پێكهێنا.

ڕاگەیێنراوی فەرمی: بەپێی ڕاگەیێنراوی ڤێرتێرنەری دهۆك، لیژنه‌كە چه‌ند نموونه‌یه‌كى ئه‌و ماسییانه‌یان هێناوه‌ته‌وه‌ كه‌ له‌ناوچوونه‌، دوای پشكنینی تاقیگەیی، بۆیان ده‌ركه‌وتووه‌ كه‌ ماسییه‌كان ژه‌هراوى نه‌كراون و هیچ نەخۆشییەكی كوشندەشیان نەبووە، و گومان دەكرێت بەهۆی لێدانی تەزووی كارەباوە لەلایەن ڕاوچییانەوە، ئەو ماسییانە لەناوچووبن، بەو پێیەی ماسییە مرداربووەكان لە جۆری بچووك و وردن و بە دەگمەن ماسی گەورەیان تێدایە.

لێدوانی فەرمی: موقەدم 'رەمەزان سیاری' بەرپرسی مەفرەزەکانی هێزی پێشمەرگەی پاراستنی ژینگەی دهۆک بە زەید تەها، پەیامنێری ئاڤای وت، "ڕەنجی ساڵێکی پاراستنی سامانی ماسیمان بە داخەوە بە خەسارەت چوو"، ڕوونیشی كردووەتەوە، كە سەرەڕای هەوڵەكانی حكومەت بۆ قەدەغەكردنی ڕاوەماسی لە وەرزی دانانی گەرای ماسی، كەچی ژمارەیەك ڕاوچیی سەرپێچیكار زۆر بێ ویژدانانە هەڵساون بە بەكارهێنانی تەزووی كارەبا لە ئاوەكە و سەرەنجام ئەو كارەساتەی لێ كەوتووەتەوە.