هەرێمی کوردستان و بەغدا یەکخستنی سیاسەت و ڕێکارە گومرگییەکان تاوتوێ دەکەن

ئاڤا نیوز

بەڕێوەبەرایەتیی گشتیی گومرگی هەرێمی كوردستان و عێراق کۆبوونەوە و یەکخستنی سیاسەت و ڕێکارە گومرگییەکانیان تاوتوێ کرد، گفتوگۆشیان لەسەر دەستبەجێی جێبەجێکردنی ئاڵوگۆڕی زانیارییەکان کرد.

وێنە گەورەکە: داهاتی نانەوتی و لەناویاندا گومرگ و ڕێکارەکانی، یەکێکە لە خاڵە ناکۆکەکانی نێوان هەولێر و بەغدا، هاوکات لەگەڵ بەردەوامی گفتوگۆکان لەسەر دۆسیەی نەوت، ئەم کۆبوونەوەیەی دامەزراوەکانی گومرگ وەک هەوڵێکی دیکە بۆ چارەسەری کێشەی مووچە سەیر دەکرێت.

ڕاگەیێنراوی فەرمی: دەستەی گومرگی عێراق بڵاویکردەوە، سامر قاسم داود، بەڕێوەبەری گشتی دەستەی گومرگ لە وەزارەتی دارایی عێراق پێشوازیی لە شاندێکی گومرگی هەرێمی کوردستان کردووە، لە کۆبوونەوەکەدا تیمی بازرگانیی و گەشەپێدانی نەتەوە یەکگرتووەکان و بەرپرسانی جێبەجێکردنی سیستمی ئەسیکۆدا (بەئەلیکترۆنیکردنی مامەڵە گومرگییەکان) بەشداربوون و باس چارەسەرکردنی ئاستەنگییەکان و جێبەجێکردنی بەئەلیکترۆنیکردنی مامەڵە گومرگییەکان کراوە.

ئەوەشی خستووەتەڕوو، لە کۆبوونەوەکەدا بەڕێوەبەری گشتی دەستەی گومرگ ئاماژەی بە گرنگی یەکخستنی ڕێکارە گومرگییەکان لەنێوان بە‌غدا و هەولێر کردووە بەتایبەت جێبەجێکردنی سیستمی ئەسیکۆدا کە وادەکات پرۆسەکان خێراترببن، ئەوەش جوڵەی بازرگانیی باشتر دەکات، ئابووری وڵاتیش لە پێشێلکاری یاسایی و بەقاچاخبردن دەپارێزێت.

لە کۆبوونەوەکەدا سێ تەوەر گفتوگۆی لەسەر کراوە:

- کاراکردنی بەیەکەوەبەستنی ئەلیکترۆنی لەنێوان ناوەندەکانی گومرگی فیدڕاڵی و کوردستان.

- گفتوگۆ لەسەر جیاوازییەکانی هەڵسەنگاندنی گومرگی و چارەسەرکردنی کێشەکان کراوە.

- شەفافییەت، چاودێریی و ئاڵوگۆڕی بازرگانی بەشێوەی ڕاستەوخۆ دەستپێبکەن.

دەستەی گومرگی عێراق دەشڵێت: "ئەم دیدارە لە چوارچێوەی هەوڵەکانی وەزارەتی دارایی دایە، بۆ یەکخستنی سیستمی گومرگ و گواستنەوە بۆ ژینگەیەکی ئەلیکترۆنی یەکگرتوو کە هاوتەریب بێت لەگەڵ پێشهاتە جیهانییەکان و کەشێکی سەلامەت و کارا بۆ بازرگانی و وەبەرهێنان دابین دەکات."