بەهۆی هەورە برووسکەوە ژمارەیەک سەرئاژەڵ مردار دەبن

ئاڤا نیوز

نیوەڕۆی ئەمڕۆ هەورەبرووسکە و بارانێکی بەخوڕ گوندی گەڵاڵەی لە سنووری قەزای ماوەت گرتەوە، بەو هۆیەوە ژمارەیەک سەرئاژەڵ مردار بوون.

وێنە گەورەکە: بەهۆی گۆڕانکاریی کەشوهەوای ئەمڕۆ کە بەهۆیەوە لە بەشێکی ناوچەکانی هەرێمی کوردستان باران باری، لە سنووری سلێمانی بارانبارینەکە هەورەبرووسکەی لەگەڵ بووە کە بووەتە زیانگەیاندن بە دار و درەخت و مەڕ و ماڵاتی هاووڵاتیان.

لێدوانی فەرمی: کامەران حەسەن، قایمقامی قەزای ماوەت، بە ئاڤا میدیای ڕاگەیاند، دوای نێوەڕۆی ئەمڕۆ بارانێکی بە خوڕ گوندی گەڵاڵەی لە قەزای ماوەت گرتەوە کە هەورەبرووسکەی لەگەڵ بووە و بووەتە هۆی مردار بوونی 16 مەڕ و بزن، لەگەڵ زیانگەیاندن بە سەدان داری بنیشتی کوردی کە ساڵانە خەڵکی ناوچەکە قوڕ لە دارەکان دەدەن و بنیشت بەرهەم دەهێنن.

قایمقامی قەزای ماوەت، دەڵێت، هەرچەندە قەرەبوو وەستاوە، بەڵام ئێمە نووسراوێک بۆ حکومەت بەرز دەکەینەوە بۆ ئەوەی قەرەبوو بکرێنەوە.