سوودانی کۆبوونەوەیەکی نائاسایی ڕێکدەخات و بڕیار لە ناردنی مووچە دەدات

ئاڤا نیوز

نووسینگەی محەممەد شیاع سوودانی، سەرۆکوەزیرانی عێراق، سەرجەم وەزیرەکانی ئاگادار کردووەتەوە سبەی پێنجشەممە بۆ کۆبوونەوەیەکی نائاسایی ئەنجوومەنی وەزیرانی عێراق ئامادەبن. کۆبوونەوەکە بۆ پەسەندکردنی ڕێککەوتننامەی نێوان هەولێر و بەغدایە.

چیرۆکی سەرەکی: دوای پەسندکردنی لە ئەنجوومەنی وەزیرانی کوردستان بە کۆی دەنگ، سەرۆکوەزیران مەسرور بارزانی ڕەشنووسی ڕێککەوتنەکەی واژۆ کردووە و بە نووسراوی فەرمی بۆ بەغدا نێردراوە.

زانیاریی تایبەت: ئاگادارییەکە لەلایەن ئەمیندارییەتی گشتیی ئەنجوومەنی وەزیرانی عێراق بۆ سەرجەم وەزیرەکان و ستافی ئەنجوومەنی وەزیران نێردراوە، لە کۆبوونەوەکەدا ڕەشنووسی ڕێککەوتنامەی نێوان هەردوو حکومەتی هەرێمی کوردستان و عێراق پەسەند دەکرێت.

لێدوانی فەرمی: سەرچاوەیەک لە حکومەتی عێراق بە ئاڤای وت، "سبەی کۆبونەوەیەکی نائاسایی ئەنجومەنی وەزیرانی عێراق لەبارەی ڕێککەوتنی نێوان حکومەتی هەرێمی کوردستان و حکومەتی عێراق دەکرێت".

رێککەوتنەکە بەم شێوەیەیە: حکومەتی هەرێمی کوردستان مانگانە 120 ملیار دینار داهاتی ناوخۆ دەداتە حکومەتی عێراق، واتا بۆ هەردوو مانگ 240 ملیار دینار، ڕۆژانەش 230 هەزار بەرمیل نەوت بە بۆری هەناردە دەکات لەڕێگەی کۆمپانیای سۆمۆی عێراق، لە بەرامبەردا حکومەتی عێراق دوو مووچە بۆ هەرێمی کوردستان دەنێرێت.

زانیاریی زیاتر: ئەم ڕێککەوتنە بۆ دوو مانگە، واتا ئەو ژمارانەی لەبارەی هەناردەکردنەوەی نەوت و داهاتی ناوخۆ لەسەری رێککەوتوون تەنیا بۆ دوو مانگن، بۆ مانگەکانی داهاتووش گفتوگۆکان بەردەوام دەبن لەسەر هەمان ڕەشنووس، بەڵام هەندێک لە ژمارەکان گۆڕانکارییان بەسەردا دێت، لەبەر ئەوەی داهات و بەرهەمهێنانی نەوت گۆڕانکاری بەسەرا دێت.

لەلایەکی دیکەوە: لەبارەی ناردنی مووچە، بەرپرسێکی باڵای حکومەتی عێراق بە ئاڤای گوت، زەحمەتە دوو مووچە بەیەکەوە بنێردرێن، چونکە حکومەتی عێراق خۆی کیشەی پارەی کاشی هەیە، بەڵام دوو مووچە مسۆگەرکراون و بەدوای یەکدا دەنێردرێن.