نزیکەی 100 داری سرووشتی لە سنووری دووکان دەبڕدرێنەوە

ئاڤا نیوز

لە سنووری قەزای دوکان ژمارەیەک داری سرووشتی دەبڕدرێنەوە، بەڕێوەبەرایەتی پۆلیسی دارستان و ژینگە لەوبارەیەوە دەڵێت 'لێکۆڵینەوەکان بۆ دۆزینەوەی بکەرەکەی دەستی پێکردووە'.

لێدوانی فەرمی: عەقید هێمن کەمەرخان، وتەبێژی پۆلیسی دارستان و ژینگەی پارێزگای سلێمانی، بە ئاڤا میدیای ڕاگەیاند: نزیکەی 100 داری سرووشتی لە جۆرەکانی داربەڕوو، دارەبەن، داربی لە سنووری گوندی کانی سیانی سەر بەناحییەی خدران لە قەزای دووکان بڕاوەتەوە.

عەقید هێمن کەمەرخان دەڵێت: زۆرینەی دارە بڕاوەکان لە جۆری دار بەڕوون، تەمەنیان لەنێوان 15 بۆ 25 ساڵە، ئەمەش زیانێکی زۆری بە ژینگە و سرووشت گەیاندووە.

ئەوەی پێویستە بیزانیت: سزای بەندکردن بۆ بکەری بڕینەوەی دار لە مانگێک کەمتر نییە و پێبژارنیش لە 100 هەزار دینارەوە دەستپێدەکات بەگوێرەی ژمارە و جۆر و تەمەنی دارەکان لەلایەن دادوەرەوە دیاری دەکرێت.