ئاڤا وادەی ناردنی پارە و دابەشکردنی مووچە ئاشکرا دەکات

ئاڤا نیوز

دوای واژۆکردنی ڕێککەوتننامەی نێوان هەولێر و بەغدا لەلایەن سوودانی، هەفتەی داهاتوو مووچەی مانگی پێنج دەنێردرێت و دەست بە دابەشکردنی دەکرێت.

وێنە گەورەکە: دوای گفتوگۆیەکی زۆر و چەندین کۆبوونەوە و گۆڕینەوەی پەیام، هەردوو حکومەتی عێراق و کوردستان لەبارەی نەوت و داهاتی ناوخۆ و مووچە ڕێککەوتن، دوێنێ و ئەمڕۆ ڕێککەوتننامەکە لەلایەن مەسرور بارزانی و سوودانی واژۆ کرا، هەفتەی داهاتووش دەست بە جێبەجێکردنی دەکرێت.

چیرۆکی سەرەکی: حکومەتی عێراق ناوەڕۆکی ڕێککەوتننامەکەی بەفەرمی ئاشكرا کرد، لە مووچە و داهاتی مانگی پێنجەوە دەستپێدەکات، بڕیاری داوە دوای هەنگاونان بۆ جێبەجێکردنی ڕرێککەوتنەکە لەلایەن حکومەتی کوردستان مووچەی مانگی پێنج خەرج بکرێت.

لێدوانە فەرمییەکان: ئاڤا لەبارەی وادەی ناردنی پارە و دابەشکردنی مووچە قسەی لەگەڵ سێ سەرچاوەی جیاواز کردووە:

حکومەتی عێراق: بەرپرسێکی باڵای حکومەتی عێراق بە ئاڤای ڕاگەیاند: 

٠ بۆ دەسپێکردنەوەی هەناردەکردنەوەی نەوت، هەندێک ڕێککاری تەکنیکی ماوە لە نێوان هەرێمی کوردستان و عێراق و تورکیا. 

٠ بۆ ناردنی مووچە، حکومەتی عێراق چاوەڕوانی هەناردەکردنی نەوت ناکات، بەڵام دەبێت بەزووترین کات دەست بە ڕێککارە تەکنیکییەکان بکرێت.

٠ وەزارەتی دارایی عێراق ئێستا چاوەڕوانی لیستی تەرازووی پێداچوونەوە (میزان مراجەعە) و داهاتی ناوخۆیە لەلایەن وەزارەتی دارایی و ئابووریی کوردستان.

٠ ڕۆژی دووشەممە یاخود سێشەممە پارەی کاشی مووچە لەلایەن بانکی ناوەندیی عێراقەوە ڕادەستی وەزارەتی دارایی کوردستان دەکرێت. بڕەکەشی هاوشێوەی مانگەکانی پێشوو دەبێت، نزیکەی 958 ملیار دینار.

بانکی ناوەندی: لقی هەولێری بانكی ناوەندیی عێراق بە ئاڤای ڕاگەیاند، پارەی پێویستییان لەبەردەستە بۆ دابینكردنی مووچە، هەر کاتێک بڕیاریان بۆ بچێت پارە ڕادەستی وەزارەتی دارایی کوردستان دەکەن.

وەزارەتی دارایی کوردستان: بەرپرسێکی وەزارەتی دارایی کوردستان بە ئاڤای گوت:

٠ لیستی مووچەی مووچەخۆران بۆ مانگەکانی پێنج و شەش لە بەغدایە و هیچ کێشەیەکیان نییە. 

٠ میزان موراجەعەی مانگی پێنج و شەش ئامادەیە و ئەگەر وەزارەتی دارایی عێراق داوای بکات ڕۆژی یەکشەممە 20ی مانگ دەینێرن. لیستی مووچە و میزان موراجەعەی مانگی حەوت کاریان لەسەر دەکرێت، ڕەنگە تا ڕۆژی یەکشەممە ئەوانیش ئامادە بکرێن. 

٠ لەبارەی ناردنی داهاتی ناوخۆ، وەزارەتی دارایی چاوەڕوانی بڕیاری ئەنجوومەنی وەزیرانی کوردستانە، بڕیاریان بۆ بچێت 120 ملیار دینار بۆ بەغدا دەنێرن و چاوەڕوان دەکرێت ڕۆژی یەکشەممە پارەکە بنێردرێت.

٠ ئامادەن بۆ دابەشکردنی مووچە،  هەر کاتێک پارەی پێویست بگات لە ماوەی چەند کاتژمێرێکدا خشتەی دابەشکردنی مووچە بڵاو دەکەنەوە، لە ماوەی سێ بۆ پێنج ڕۆژیشدا دەتوانن مووچە دابەش بکەن. 

٠ خشتەی دابەشکردنی مووچە هاوشێوەی مانگی چوارە و گۆڕانکارییەکی ئەوتۆی تێدا ناکرێت. لیستی مووچەی مانگی چوار بە خانەنشینانی مەدەنی و خاوەن پێداویستییە تایبەتەکان و کەسوکاری شەهیدان و ئەنفالکراوان دەستیپێکرد و بە سێ ڕۆژ تەواو بوو.

باکگراوند: ناوەڕۆکی ڕێککەوتننامەی هەولێر و بەغدا شەش بڕگە لەخۆدەگرێت و تاوەکو کۆتایی ئەمساڵ کاری پێدەکرێت، بەڵام مەرج نییە گۆڕانکاری تێدا نەکرێت.

دەقی ڕێککەوتنەکە لەم لینکە بخوێنەوە...