ئاگرەکەی حەساری سەکران دوای کۆنترۆڵکردنی جارێکی دیکە سەری هەڵدایەوە

ئاڤا نیوز

 

دوای ئەوەی بەرەبەیانیی ئەمڕۆ شەممە ئاگرەکەی حەساری سەکران لە چۆمان کۆنترۆڵ کرا، جارێکی دیکە سەری هەڵدایەوە.

 

چیرۆکی سەرەکی: ڕۆژی هەینی کاتژمێر: 12:20 خولەکی نیوەڕۆ ئاگر لە چیای حەساری سەکران لە چۆمان کەوتەوە، دواتر لەلایەن ژمارەیەک تیمی بەرگریی شارستانی لە کاتژمێر 4:20 خولەکی بەرەبەیانیی ئەمڕۆ توانرا ئاگرەکە کۆنترۆڵ بکرێت، بەڵام نیوەڕۆی ئەمڕۆ جارێکی دیکە ئاگرەکە سەری هەڵداوەتەوە.

 

لێدوانی فەرمی: موقەدەم کاروان میراودەلی، بەڕێوەبەری بەرگریی شارستانیی سۆران بە ئاڤا میدیای گوت: سەرەڕای سەختی شوێنەکە و بوونی کێڵگەی میڕێژکراو توانیمان لەڕێگەی 12 تیم ئاگرەکە کۆنترۆڵ بکەین، وەک دڵنیایی تیمێکی چاودێرییمان لەو شوێنە جێهێشت، بەداخەوە ئەمڕۆ جارێکی دیکە ئاگرەکە سەری هەڵداوەتەوە، بۆیە پێنج تیممان ڕەوانەی شوێنی ئاگرەکە کردووە، خۆم و چەند تیمێکی دیکەش دەچین بۆ کۆنترۆڵ کردنی ئەو ئاگرە.

 

موقەدەم کاروان میراودەلی باسی سەختی شوێنەکە دەکات و دەڵێت، شوێنەکە سەختە، تیمەکان دوو کاتژمێر بە پیادە لەناو شاخدا دەڕۆن تا دەگەنە شوێنی ئاگرەکە، کێڵگەی مینڕێژکراویشی لێیە، بۆیە کۆنترۆڵکردنی ئەو ئاگرە زۆر سەختە.

 

هۆکارە زانراوەکان: بەپێی زانیارییە سەرەتاییەکان و بەگوتەی شوانێکی شایەتحاڵ، مینێک بە ئاژەڵێکدا تەقیەوەتەوە و بووەتە هۆیە دروست بوونی ئەو ئاگرە.

 

ئەوەی پیویستە بیزانیت: چیای حەساری سەکران کەوتووەتە سنووری قەزای چۆمان لە ئیدارەی سەربەخۆی سۆران، ناوچەیەکی گەشتیارییە و ساڵانە ژمارەیەکی زۆر گەشتیار ڕووی تێدەکەن.