دەریاچەی زرێباری ڕۆژهەڵاتی کوردستان بووەتە پەناگەی فلامینگۆکان

ئاڤا نیوز

 

بەهۆی دابەزینی پلەکانی گەرما لە ناوچەکانی سیبریا، زیاتر لە 70 فلامینگۆ بۆ دەریاچەی زرێبار لە ڕۆژهەڵاتی کوردستان کۆچیان کردووە.

 

وێنە گەورەکە: دەریاچەی زرێبار لە شاری مەریوانی ڕۆژهەڵاتی کوردستان بە هۆی بوونی خۆراکی هەمەجۆر و ئاسایشی گونجاو، بووەتە یەکێک لە گرنگترین ژینگە و شوێنی پشوودانی باڵندەکان لە ناوچەکەدا. ساڵانە ژمارەیەکی زۆر لە باڵندەی ئاوی و کەنارئاوی کۆچ بۆ ئەم دەریاچەیە دەکەن.

 

لێدوانی فەرمی: بەڕێوەبەری کارگێڕیی پاراستنی ژینگەی مەریوان بە ئاژانسی تەسنیمی ڕایگەیاند: هۆکاری هاتنی ئەم باڵندە جوانانە بۆ دەریاچەی زرێبار دەگەڕێتەوە بۆ دابەزینی پلەکانی گەرما لە ناوچەکانی سیبریا و کۆچی باڵندە ئاوییەکان.

 

زانیاریی زیاتر: فلامینگۆ باڵندەیەکە بە قاچە درێژەکانی و دەنووکێکی چەماوە و ملی درێژی ناسراوە. جەستەیەکی زۆر درێژ و پەڕ و باڵی سپی و پەمەیی هەیە. بەرزییەکەی لە نێوان 90 سانتیمەتر بۆ 1.5 مەتر دەبێت. لەکاتی فڕیندا باڵ و ملی ڕاست دەکاتەوە و کەمێک نزمتر لە ئاستی جەستەی ڕایدەگرێت. باڵەکانی تێکەڵەیەکی جوانی ڕەنگی سوور و ڕەشن و بە هێمنی دەڕوات.

 

باکگراوند: دەریاچەی زرێبار لە ساڵی 2009ـوە بە هۆی بوونی هەمەجۆریی ژینگەیی و جۆرەها گیانەوەر و ڕووەک، وەک پەناگەی ژیانی کێوی پەسەند کراوە و دوای نۆ ساڵ وەک 25ـەمین تاڵاوی نێودەوڵەتی لە پەیماننامەی ڕامسەر تۆمار کراوە، بەپێی دوایین زانیارییەکان، ئەم دەریاچەیە 14 جۆر ماسی، 27 جۆر شیردەر، زیاتر لە 300 جۆر باڵندە و 260 جۆر ڕووەکی ئاوی و چەندین جۆر زیندەوەری دیکەی تێدایە.