لە جیهان نزیکەی یەک ملیار کەس  بەهۆی نەبوونی ئاوی پاک دەناڵێنن

ئاڤا نیوز

لە کاتێکدا ئاو سەرچاوەی ژیانە و هەموو شتێکی زیندوو لە ئاو دروست کراوە، بەڵام ساڵانە سەدان ملیۆن کەس بەهۆی نەبوونی ئاو و نەبوونی ئاوی پاک گیانلەدەست دەدەن.

وێنەگەورەکە: سەڕەرای هەوڵەکانی نەتەوەیەکگرتووەکان و کۆمەڵگەی نێودەوڵەتی بۆ دەستڕاگەیشتن بە ئاوی پاک لە جیهاندا چڕتر کراونەتەوە، بەڵام هێشتا ئاستەنگ و میکانزمەکانی دەسڕاگەیشتن بە ئاوی پاک بە تەواوی چارەسەر نەکراون، بەپێی ئامارێکی نەتەوەیەکگرتووەکان ساڵانە دوو ملیۆن و 600 هەزار کەس بەهۆی ئاوی پیسەوە دەمرن.

ئەوەی پێویستە بیزانیت: بەپێی ڕاپۆرتێک کە لە ماڵپەری وۆرلد ڤیژن 'WORLD VISION' بڵاوکراوەتەوە تێیدا، ئامارەکان بەم شێوەیەن:

- 703 ملیۆن کەس لە سەرانسەری جیهاندا دەستیان بە ئاوی پاک ناگات، واتە لە هەر 11 کەس دا یەک کەس بێ ئاوی پاکە.

- دوو ملیار و 200 ملیۆن  کەس بە سەلامەتی دەستیان بە خزمەتگوزارییەکانی ئاو ناگات.

- لە سەرانسەری جیهاندا ئافرەتان شەش کیلۆمەتر بەپێ دەڕۆن بۆ بەدەستکەوتنی ئاوی پاک، واتە ئەگەر لێکدانەوەی بۆ بکەین بە نزیکەی 250 ملیۆن کاتژمێر ئافرەتان لە سەرانسەری جیهاندا کاتیان لە هەڵگرتنی ئاو بەسەر دەبەن. 

- لە جیهاندا ڕۆژانە زیاتر لە هەزار منداڵی خوار تەمەن پێنج ساڵ بەهۆی نەخۆشییەکانی پەیوەست بە کەمی ئاوی پاک دەمرن.