لە ڕۆژهەڵاتی کوردستان بە هۆی گەرماوە هۆشداریی ئاستی پرتەقاڵی دەدرێت

ئاڤا نیوز

تا دێت پلەکانی گەرما بەرز دەبنەوە و کەشناسیی پارێزگای سنەش هۆشداریی ئاستی پرتەقاڵی لە هاتنی گەرمایەکی بەتین بە دانیشتووانی سنووری پارێزگاکە دەدات.

وێنە گەورەکە: بە هۆی بەرزبوونەوەی زیاتری پلەکانی گەرما لە ڕۆژهەڵاتی کوردستان، کەشناسیی پارێزگای سنە هۆشداریی ئاستی پرتەقاڵی ڕادەگەیێنێت و دەڵێت، پێویستە هاووڵاتیان ڕێنماییەکانی خۆپاراستن لە گەرما بە جددی وەربگرن و لە کاتە گەرمەکاندا خۆیان لە چالاکییەکانی چوونە بەرخۆر و دەرەوە بپارێزن.

لێدوانی فەرمی: ڕەحیم سدیقی، بەڕێوەبەری گشتیی کەشناسیی پارێزگای سنە ڕایدەگەیێنێت: سەرەتای هەفتەی داهاتوو هۆشداریی ئاستی پرتەقاڵی دراوە سەبارەت بە هاتنی شەپۆلێکی گەرما لە پارێزگاکەدا و تاوەکو کۆتایی هەفتەش پلەکانی گەرما ڕوو لە بەرزبوونەوە دەکەن و گەرماکە زیاتر دەبێت.

- پێشبینییەکان ئاماژە بەوە دەکەن کە بەرزترین پلەی گەرمای ڕۆژانە لە نیوەی باشووری پارێزگاکە بگاتە نێوان 41 بۆ 46 پلە، دوێنێش لە گەرمترین کاتژمێرەکانی ڕۆژدا، پلەی گەرما لە سەوڵاوای هەورامان 45 پلە، سەروئاباد 42 پلە، سنە 41 پلە و کامیاران 40 پلە تۆمار کراوە.

- ئەگەری ئاگرکەوتنەوە لەو ناوچانەدا هەیە کە پووش و پاوانیان زۆرە و هۆشداری بە جووتیاران و هاووڵاتیان دەدات خۆیان لە ئاگرکردنەوە و جێهێشتنی پاشماوەی ئاگر لەو ناوچانە بپارێزن.

باکگراوند: هۆشداریی ئاستی پرتەقاڵی لە پێشبینییەکانی کەشوهەوادا بە واتای ئەگەری زۆری ڕوودانی کارەسات یان ڕووداوی زیانبەخش دێت و کاریگەریی نەرێنی لەسەر ژیانی ڕۆژانە دەبێت. ئەم هۆشدارییە زیاتر بۆ لایەنە پەیوەندیدارەکان دەردەکرێت بۆ ئامادەباشی و گرتنەبەری ڕێوشوێنی پێویست تاوەکو زیانەکان کەم بکرێنەوە.