جێگری سەرۆكی ئەمریكا: دوور نییە ئیسرائیل سزا بدەین

ئاڤا نیوز

 

جێگری سەرۆكی ئەمریكا لە هێرشەکانی ئیسرائیل بۆ سەر کەرتی غەززە نیگەرانە و دەڵێت: هەڵەیەكی كوشندەیە ئەگەر ئیسرائیل هێرش بكاتە سەر ڕەفەح، بەدووریشی نازانم ئەمریكا سزای بدات.

 

وێنە گەورەكە: كاردانەوەكان سەبارەت بە هێرشی ئیسرائیل بۆ سەر كەرتی غەززە بەردەوامن؛ لە دوایین لێدوانیدا جێگری سەرۆكی ئەمریكا دەڵێت، لە کاتی هێرشی ئیسرائیل بۆ سەر ڕەفەح، هیچ شوێنێك نییە ئەو هەموو ئاوارەیەی لێ کۆبکرێتەوە.

 

لێدوانی فەرمی: كەمالا هاریس، جێگری سەرۆكی ئەمریكا ڕایگەیاند: "هێرشی ئیسرائیل بۆ ڕەفەح، دەرئەنجامی زۆر خراپی دەبێت، لەسەر نەخشە بەدواداچوونیان بۆ دۆخى ڕەفەح کردووە، هیچ شوێنێک نییە تاوەكو یەک ملیۆن و 500 هەزار دانیشتووى بۆ ببەن".

 

ئەوەی پێویستە بیزانیت: لە سەرەتای دەستپێكردنی شەڕ لە كەرتی غەززە، ملیۆنێك و 500 هەزار هاووڵاتی لە كەرتەكەوە ڕوویان لە ناوچەی ڕەفەح كرد؛ نیگەرانییەكانیش سەبارەت بە هێرشی ئیسرائیل بۆ سەر كەرتەكە بەردەوامن و دەیان وڵات داوایان لە ئیسرائیل کردووە هێرشەکانی بووەستێنێت.