پێشەوا هەورامانی ناوەڕۆکی کۆبوونەوەی ئەنجوومەنی وەزیرانی کوردستان ئاشكرا دەکات

ئاڤا نیوز

 

گوتەبێژی حکومەتی هەرێمی کوردستان لەبارەی کۆبوونەوەی ئەمڕۆی ئەنجوومەنی وەزیران دەڵێت، "سەرۆکوەزیران مەسرور بارزانی لە کۆبوونەوەی ئەنجوومەنی وەزیران لەبارەی مووچەوە ڕوونکردنەوەی دا، کە لەگەڵ حکومەتی عێراق چی ڕووی داوە و لە چ قۆناغێکداین".

 

چیرۆکی سەرەکی: ئەمڕۆ چوارشەممە ئەنجوومەنی وەزیرانی کوردستان كۆبوونەوەی ئاسایی خۆی ساز کرد، ڕێککەوتنی نێوان هەولێر و بەغدا، جێبەجێكردنی دەقی ڕێككەوتنەکە و مووچە و هەناردەی نەوت لەسەر مێزی کۆبوونەوەکە بوون و گفتگۆیان لەبارەوە کرا.

 

لێدوانی فەرمی: لەبارەی هۆکارەکانی درەنگکەوتنی ناردنی مووچەی خەڵکی کوردستان، پێشەوا هەورامانی دەڵێت، "بیانووی عێراق نەبوونی سیولە بوو، گوایە ئەمڕۆ پارە پەیدا دەکەن و تەمویلی مووچە دەکەن".

 

پێشەوا هەورامانی گوتیشی، سەرۆکوەزیران مەسرور بارزانی لە کۆبوونەوەی ئەنجوومەنی وەزیران لەبارەی مووچەوە ڕوونکردنەوەی دا، کە لەگەڵ حکومەتی عێراق چی ڕووی داوە و لە چ قۆناغێکداین.

 

-بەغدا یەک دوو بیانووی هەبوو کە ڕۆژی سێشەممە تەمویلی مووچەی نەکرد، گوایە سیولەی نەبووە، بەڵام دەگوترێت پارە بۆ ئەوە پەیدا دەکەن.

-وەزارەتی دارایی و ئابووری هەموو ئامادەکارییەکی خۆی کردووە، کە تەمویلکرا فەرمانبەرانی دەگەڕێنەوە بۆ دەوام و ڕۆژانی پشووش مووچە دابەش دەکرێت. 

-لە کۆبوونەوەکەدا باس لەوە کرا کە حکومەتی هەرێمی کوردستان هەموو پابەندییەکانی خۆی جێبەجێ کردووە، نابێت چیتر بەم جۆرە مامەڵە لەگەڵ هەرێمی کوردستان و مووچەخۆرانی بکرێت.

-حکومەتی عێراق دەبێت پابەندییەکانی خۆی جێبەجێ بکات، خەمی ئەوەی نەبێت، حکومەتی هەرێمی کوردستان پابەندی خۆی جێبەجێ دەکات.

 

لەلایەکی دیکە: هەرچی پەیوەستە بە پەیوەندییە تەلەفۆنییەکەی نێوان مارکۆ ڕوبیۆ، وەزیری دەرەوەی ئەمریکا لەگەڵ محەممەد شیاع سوودانی ،سەرۆکوەزیرانی عێراق، گوتەبێژی حکومەتی هەرێمی کوردستان گوتی، ئەمریکا لەبارەی پرسی مووچەی خەڵکی کوردستان قسەی خۆی هەبووە.