974 ملیار خرایە سەر هەژماری وەزارەتی دارایی و سبەی مووچە دابەش دەکرێت

ئاڤا نیوز

 

وەزارەتی دارایی و ئابووریی هەرێمی کوردستان ڕایگەیاند، بڕی 974 ملیار دینار خرایە سەر هەژماری بانکی وەزارەتەکەیان و بڕیارە سبەی دەست بە دابەشکردنی مووچە بکرێت.

 

بۆچی گرنگە: ئەمڕۆ پێنج شەممە ڕێککەوتی 24ـی 7ـی 2025، دوای نزیکەی 83 ڕۆژ، بەغدا بریاری دا مووچەی مووچەخۆرانی هەرێمی کوردستان ڕەوانە بکات، ئەمەش پاش ئەوەی هەولێر و بەغدا گەیشتنە لێکتێگەیشتنێکی هاوبەش.

 

ڕاگەیێنراوی فەرمی: وەزارەتی دارایی و ئابووری حکومەتی هەرێمی کوردستان ڕایگەیاند: ڕۆژی پێنجشەممە، بڕی 974 ملیار و 813 ملیۆن دینار وەک شایستەی مووچەی مووچەخۆران خرایە سەر هەژماری بانکی وەزارەتی دارایی و ئابووری لە لقی هەولێری بانکی ناوەندیی عێراق.

 

ئەوەی پێویستە بیزانیت: پێش ڕاگەیێنراوەکەی وەزارەتی دارایی و ئابووریی هەرێمی کوردستان ئاڤا لە زاری سەرچاوەیەکی ئاگادارەوە لە لقی هەولێری بانکی ناوەندی بڵاویکردەوە، کە ئاگادارکردنەوەی خەرجکردنی مووچەی مانگی پێنج گەیشت.

 

هەنگاوی دواتر: بەگوێرەی وەزارەتی دارایی سبەی هەینی 25-7-2025، دەست بە دابەشکردنی مووچە دەکرێت.

 

ئەوەی پێشبینی دەکرێت: سەرچاوەیەک لە وەزارەتی دارایی و ئابووریی کوردستان بە ئاڤا میدیای ڕاگەیاند: "پاش کەمێکی دیکە خشتەی مووچە بڵاودەکەینەوە". دەشڵێت، "دەمانەوێت لە سێ ڕۆژدا مووچەی سەرجەم مووچەخۆران دابەش بکەین".

 

باكگراوند: بەپێی ئەو ڕێككەوتنەی كە هەفتەی ڕابردوو لەلایەن هەردوو حكومەتی هەرێمی كوردستان و حكومەتی عێراق واژۆ كرا، دەبێت لەمەودوا هەرێمی كوردستان مانگانە 120 ملیار دیناری داهاتی نانەوتی و 230 هەزار بەرمیل نەوتی ڕۆژانە بدات بە حكومەتی عێراق لەبەرامبەردا بەغدا مانگانە لە وادەی خۆیدا مووچەی فەرمانبەرانی هەرێمی كوردستان دەنێرێت.