لووتکەی وەبەرهێنانی سووریا - سعوودیە لە دیمەشق دەستیپێکرد

ئاڤا نیوز

 

ئەمڕۆ پێنجشەممە لووتکەی وەبەرهێنانی سعوودیە - سووریا لە دیمەشقی پایتەختی سووریا بەسەرپەرشتی ئەحمەد شەرع، سەرۆککۆماری سووریا دەستی بە کارەکانی کرد.

وێنە گەورەکە: لە دوای ڕووخانی ڕژێمی بەشار ئەسەد لە کۆتاییەکانی ساڵی 2024، حکومەتی نوێی سووریا هەوڵەکانی بۆ بونیادنانەوەی ئابووری و پەیوەندییە سیاسی و بازرگانیەکان دەستپێکرد، پەیوەندی نێوان سعوودیە و سووریا لە قۆناغی دوای بەشار ئەسەد بە گرنگترین پەیوەندیی سووریا دادەنرێت و هەردوو دەوڵەت کار بۆ دروستکردنی پەیوەندییەکی بەهێزی ئابووری و سیاسی دەکەن.

لێدوانی فەرمی: حەمزە موستەفا، وەزیری ڕاگەیاندنی سووریا بە میدیاکانی ڕایگەیاند: لە لووتکەی وەبەرهێنانی سووریا و سعوودیە 44 ڕێککەوتنامەی گەورە واژۆ دەکرێت کە بەهاکەیان زیاد لە 6 ملیار دۆلارە و دەبێتە هۆی خستنەڕووی 50 هەزار هەلی کار، گرێبەست و ڕێککەوتننامەکان هەموو بوارەکان دەگرێتەوە و دابەش دەکرێت بەسەر 14 پارێزگاکەی سووریادا. 

لەلایەکی دیکەوە: خالد فالح، وەزیری وەبەرهێنانی سعوودیە ڕایگه‌یاند، ڕیاز پڕۆژەی گەورە لە سووریا ڕادەگەیەنێت، 130 وەبەرهێنەری سعوودیە بەشدار دەبن لە پرۆژەکانی سووریا و پەیوەندییەکی بەهێزی ئابووری بونیاد دەنێن.