دوایین زانیاری له‌باره‌ى مووچه‌ و ڕێككه‌وتنی هه‌ولێر و به‌غدا

ئاڤا نیوز

یەکشەممەی داهاتوو دوایین مۆڵەتە بۆ چوار لیژنەکە، بۆئەوەی ڕاپۆرتی خۆیان ئامادە بکەن و بیدەنە سوودانی، بەڵام تا ئێستا هیچ ڕاپۆرتێک ئامادە نییە، "حکومەتی هەرێمی کوردستانیش دەڵێت، ئامادەین 120 ملیار دینار بدەینە بەغدا لەگەڵ ئەو بڕە نەوتەی هەمانە".

وێنە گەورەکە: سەرەتای هەفتەی داهاتوو، ڕۆژی یەکشەممە 3-8-2025، دوایین مۆڵەتە بۆ لیژنەکان کە ڕاپۆرتی خۆیان لەبارەی کێشەکانی نێوان هەولێر و بەغدا بخەنە بەردەم سوودانی، بەڵام تا ئێستا هیچ پێشهاتێکی تازە نییە، چونکە بڕیار بوو هەموو لیژنەکان سەردانی هەولێر بکەن، بەڵام تەنیا لیژنەی نەوت هاتووە. لیژنەی داهاتی ناوخۆش وتوویەتی، "بەپێی ڕێککەوتنەکە بۆ مانگی شەش 120 ملیار دینار داهاتی ناوخۆ و ڕۆژانە 230 هەزار بەرمیل نەوتمان پێبدەن".

زانیاریی تایبەت: سەرچاوەیەک لە حکومەتی هەرێمی کوردستان بە ئاڤای ڕاگەیاند: حكومەتی كوردستان ڕژدە لەسەر جێبەجێكردنی ڕێککەوتنەکە، "ئامادەین ئەم مانگەش 120ملیار دینار وەک داهاتی ناوخۆ بنێرین و پارە ئامادەیە".

سەرچاوەکە دەڵێت، "بەرهەمی نەوتمان هەر چەند بێت، ڕۆژانە 50 هەزار بەرمیل بۆ پێداویستی ناوخۆ دەگێڕینەوە، ئەوەی دەمێنێتەوە، ئامادەین بیدەینە بەغدا". ئاڤا زانیویەتی، ئێستا هەرێمی کوردستان ڕۆژانە نزیکەی 120 هەزار بەرملیل نەوتی هەیە.

سەرچاوەکەی حکومەتی هەرێمی کوردستان وەڵامی ئەو کەس و لایەنانەش دەداتەوە کە دەڵێن، حکومەتی کوردستان ئامادە نییە 120 ملیار دینار داهات بۆ بەغدا بنێرێت، دەڵێت، ئەگەر ئێمە 120 ملیارەکەشمان نەنارد، حکومەتی عێراق خۆی دەتوانێت ئەو 120 ملیار دینارە لە پارەی مووچە ببڕێت کە بۆ هەرێمی کوردستانی دەنێرێت.

ئەوەی پێویستە بیزانیت: پێشتر هەولێر و بەغدا لەسەر ئەوە ڕێککەوتن کە هەرێمی کوردستان پابەند دەبێت بە ڕادەستکردنی 120 ملیار دینار داهاتی ناوخۆ و هەناردەکردنەوەی نەوتی کوردستان لەڕێگەی سۆمۆوە، لەبەرامبەردا بەغدا مووچەی فەرمانبەرانی کوردستان ڕەوانە دەکات.