سامانە سرووشتییەکان: یەک دینار لە بودجە بۆ پیشەسازیی نەوت خەرج نەکراوە

ئاڤا نیوز

 

یەکێک لە کێشە سەرەکییەکانی هەولێر و بەغدا لەبارەی نەوت خەرجیی کۆمپانیاکانە؛ هەرێمی کوردستان داوای زیاتر لە 20 دۆلار دەکات و عێراقیش تەنیا شەش دۆلاری دیاری کردووە، وەزارەتی سامانە سرووشتییەکانیش ڕایدەگەیێنێت، پیشەسازیی نەوتی کوردستان یەک دیناری لە بودجە بۆ خەرج نەکراوە.

 

ڕاگەیێنراوی فەرمی: وەزارەتی سامانە سرووشتییەکان: "پیشەسازیی نەوتی هەرێم لەڕێگەی وەبەرهێنانی دەرەکی و بەبێ خەرجکردنی یەک دینار لە بودجە دامەزراوە، بەڵام لە یاسای بودجەدا هاوشێوەی ئەو پیشەسازییەی نەوتی عێراق هەژمار کراوە کە لەسەر ملیاران دۆلار لە بودجەی گشتی دامەزراوە".

 

لێدوانی فەرمی: مایڵز کاگینز، گوتەبێژی کۆمەڵەی پیشەسازیی نەوتی کوردستان بە ئاڤا نیوزی گوت: "تاکه‌ مه‌رجمان ئه‌وه‌یه‌ ده‌بێت نرخى تێچووى ده‌رهێنانى یه‌ک به‌رمیل نه‌وت له‌ ھەمواری یاسای بودجه‌ بۆ 20.6 دۆلار به‌رز بکرێته‌وه‌".

 

پەیوەست بەم بابەتە: نەهرۆ ڕواندزی، جێگری سەرۆکی لیژنەی نەوت و گاز لە ئه‌نجوومه‌نی نوێنه‌رانی عێراق بۆ ئاڤا نیوز گوتی: "نووسراومان ئاراسته‌ی سه‌رۆکوه‌زیرانی هه‌رێمی کوردستان و سەرۆکوەزیرانی عێراق کردووه‌، بۆ ئه‌وه‌ی نرخی تێچووی ده‌رهێنانی نه‌وتی کوردستان له‌ شەش دۆلارەوە بەرزبکرێتەوە بۆ ئاستی خۆی".

 

ئەوەی پێویستە بیزانیت: ئەو بڕە پارەیەی بۆ بەرهەمهێنان و گواستنەوەی نەوتی کوردستان تەرخان کراوە، بەهیچ شێوەیەک لەگەڵ تێچووی ڕاستەقینەی پرۆسەکە ناگونجێت.

 

ئەوەش بزانە: هەرێمی کوردستان بۆ پیشەسازیی نەوت یەک دۆلاری بودجەی گشتی خەرج نەکردووە، هەر بۆیە داوای ئەو بڕە پارەیە لە عێراق دەکات لە بەرامبەر خەرجیی دەرهێنان و گواستنەوەی نەوت.

 

زانیاریی زیاتر: کۆمپانیاکانی بەرهەمهێنانی نه‌وت به‌ کەمتر لە 21 دۆلار بۆ دەرهێنانی یه‌ک به‌رمیل نه‌وت لە هەرێمی کوردستان ڕازى نین، هاوکات حکومه‌تى عێراقیش تێچووه‌که‌ى له‌ یاسای بودجەد‌ا به‌ شەش دۆلار دیاری کردووە‌.