پەرلەمانی فەڕەنسا سەرکۆنەی کۆمەڵکوژیی جەزائیریەکانی پاریس دەکات

ئاڤا نیوز

پەرلەمانی فەڕەنسا بڕیارێکی تایبەت بە کۆمەڵکوژکردنی جەزائیریەکانی پاریس لە ساڵی 1961 دەرکرد. بڕیارەکە ڕووداوەکەی بە "سەرکوتکارییەکی خوێناوی و کوشندە" ناوبردووە. 

وێنە گەورەکە: بە 67 دەنگی بەڵێ و 11 دەنگی نەخێر، پەرلەمانی فەڕەنسا بڕیاری سەرکۆنەکردنی کۆمەڵکوژکردنی جەزائیریەکانی پاریسی دەرکرد و بە تاوانێکی سەردەمی داگیركاری فەڕەنسای ناساند کە دەوڵەتی فەڕەنسا كردوویەتی.  

باکگراوند: ڕۆژی 17ـی ئۆکتۆبەری 1961 پۆلیسی پاریس خۆپیشاندانێکی ئاشتییانەی جەزائیریەکانی لە دژی شەڕی فەڕەنسا و جەزائیر (1958-1962) سەرکوت کرد. لەم سەرکوتکردنەدا دەیان، بە گوێرەی هەندێک سەرچاوەش سەدان، خۆپیشاندەر کوژران و تەرمەکانیان فڕێدرایە ناو ڕووباری ساین. فەڕەنسا تا ساڵی 2021 کۆمەڵکوژییەکەی پەردەپۆش کرد.

ئەوەی پێویستە بیزانیت: لە ماوەی ساڵانی ڕابردوودا، فەڕەنسا چەند بڕیارێکی بۆ ساڕێژکردنی برینی جەزائیرییەکان داوە، بەڵام هەمیشە ئەوەی ڕەتکردووەتەوە کە داوای لێبووردن بکات بەرامبەر بە داگیرکردنی ئەو وڵاتە بۆ ماوەی 132 ساڵ.