پووتین چاوی لە دڵی پیشەسازی ئۆکراینایە

ئاڤا نیوز

داهاتووی هەرێمی دۆنباس، کە بە دڵی پیشەسازی ئۆکراینا دادەنرێت لە ڕۆژهەڵاتی ئەو وڵاتە بووە تەوەری سەرەکی کۆبوونەوەکەی نێوان دۆناڵد ترەمپ، سەرۆکی ئەمریکا و ڤلادیمێر پووتین، سەرۆکی ڕووسیا.

زانیاریی بەدەستهاتوو: پووتین لە کۆبوونەوەکەیدا لەگەڵ ترەمپ لەبەرامبەر ڕاگەیاندنی ئاگربەست لەگەڵ ئۆکراینا داوای کردووە هێزەکانی ئۆکراینا لە دۆنێتسک بکشێتەوە.

لێدوانی فەرمی: ڤۆلۆدیمێر زێلینسکی، سەرۆکی ئۆکراینا ڕایگەیاندووە، پووتین دەیەوێت ئەو 30%ـیەی کە ماوەتەوە لە ناوچەکە کۆنترۆڵ بکات، کە لە سێ ساڵی ڕابردوودا شوێنی بەشێک لە تووندترین شەڕەکانی جەنگی نێوان ڕووسیا و ئۆکراینا بووە. لەدەستدانی دۆنێتسک دەسەڵاتی نزیکەی تەواوی هەرێمی دۆنباس دەداتە دەست ڕووسیا، کە ناوچەیەکی پیشەسازیی گرنگە و ماوەیەکی زۆرە پووتین چاوی تێبڕیوە.

لەم چەند ڕۆژەی ڕابردوودا، زێلینسکی بەڵێنی دا کە ئۆکرانیا "هەرگیز واز لە دۆنباس ناهێنێت" و هۆشداریی دا کە پووتین لەوانەیە وەک "پردێکی پەڕینەوە" بۆ هێرشی داهاتوو بەکاری بهێنێت.

زانیاریی زیاتر: دۆنباس دەکەوێتە سەر سنووری ڕۆژهەڵاتی ئۆکراینا و ناوەکەی لە "حەوزی دۆنێتس" وەرگیراوە، کە کورتکراوەی "حەوزی خەڵووزی دۆنێتس"ـە، ئاماژەیەکە بە بوونی خەڵووز لە ناوچەکەدا. ئەم هەرێمە پارێزگاکانی دۆنێتسک و لوهانسک دەگرێتەوە کە لە بەرەی پێشەوەی جەنگ بوون.

هەرێمی دۆنباس لە ساڵی 2014ـەوە بەشێکی لەلایەن ڕووسیاوە داگیرکراوە، هاوکات لەگەڵ لکاندنی نیمچە دوورگەی کریمیا. جوداخوازانی سەر بە ڕووسیا لە حکومەتی ئۆکراینا جیابوونەوە و دوو "کۆماری گەل"ـی سەربەخۆیان لە دۆنێتسک و لوهانسک ڕاگەیاند، کە بووە هۆی ئەوەی مۆسکۆ دەست بەسەر زیاتر لە سێیەکی خاکی ڕۆژهەڵاتی ئۆکراینادا بگرێت.

ئابووریی پیشەسازیی دۆنباس پشتی بە کانەکانی خەڵووز و کانزاسازی بەستووە و گەورەترین یەدەگەکانی خەڵووزی ئۆکراینای تێدایە و جگە لە گرنگییە ئابوورییەکەی، دۆنباس پشتێنەیەکی بەرگری گرنگە بۆ ئۆکراینا.