شەپۆڵێكی خۆڵبارین چەند ناوچەیەكی هەرێمی كوردستان دەگرێتەوە

ئاڤا نیوز

لە شەوی ڕابردووەوە شەپۆلێكی خۆڵبارین چەند ناوچەیەكی هەرێمی كوردستانی گرتووەتەوە و لە بەرەبەیانی ئەمڕۆوە چڕتر بووەتەوە.

ڕاگەیێنراوی فەرمی: بەپێی ڕاگەیێنراوێكی بەڕێوەبەرایەتیی كەشناسی و بوومەلەرزەزانیی هەرێمی كوردستان شەپۆڵەكە لە بەشەكانی باكووری ڕۆژئاوای عێراقەوە سەرچاوەی گرتووە و زیاتر ئیدارەی گەرمیان و باشووری پارێزگای هەولێر و بەشێك لە پارێزگای كەركووكی گرتووەتەوە و پێشبینیش دەكرێت تاوەكوو چەند كاتژمێرێكی دیكەش بەردەوام بێت.

لەلایەكی دیكەوە: بەڕێوەبەرایەتیی هاتووچۆی سلێمانی لە ڕاگەیێنراوێكدا هۆشداریی دەداتە شۆفێران كە بە هۆی كەمبوونەوەی ڕادەی بینین، لەپێناو سەلامەتیی گیانی خۆیان باشتر پابەندی ڕێنماییەكان بن و بەرپرسیارانە شۆفێری بكەن.

زانیاریی زیاتر: بەڕێوەبەرایەتییە ڕێنمایی بە شۆفێران دەدات كە ماسكی سەلامەتی بەكاربهێنن و ماوەی سەلامەتی لە نێوان ئۆتۆمبێلەكان بهێڵنەوە، سەبارەت بە ناوچە شاخاوییەکانیش و ڕێگاکانی دەرەوەی شار تا دەكرێت بەکار نەهێنرن و گەشتەکان دوا بخرێن تا ئەو کاتەی ئەم شەپۆلی خۆڵبارینە کۆتایی پێدێت.