300 دۆنم پووش و پاوان لە سنووری ماوەت سووتا

ئاڤا نیوز

لە سنووری ناحیەی گەرمک ئاگرێکی گەورە کەوتەوە، بەوهۆیەوە سەدان دۆنم پووش و پاوان و دارستانی سرووشتی سووتان.

بڵاوکراوەی فەرمی: بەڕێوەبەرایەتی دارستان و ژینگەی سلێمانی ڕایگەیاند: ڕۆژی 19ـی ئاب ئاگرێکی گەورە لە سنووری گوندەکانی ناحیەی گەرمک کەوتەوە، لەلایەن پۆلیسی دارستان و ژینگە، ئاسایش، پاسەوانی سنوور، پۆلیسی گەرمک و هاووڵاتیانی سنوورەکە توانرا ئاگرەکە کۆنترۆڵ بکرێت.

بەگوێرەی زانیاری و لێکۆڵینەوە سەرەتاییەکان، سەرچاوەی ئاگرەکە لە سنووری ئێرانەوە بووە بۆ سنووری ناحیەی گەرمک تەشەنەی سەندووە، بەوهۆیەوە 300 دۆنم پووش و پاوان و دارستانی سرووشتی سووتاون.

لەلایەکی دیکەوە: ئاگر لە سنووری گوندی بەزەڕوو سەر بە قەزای ماوەت کەوتەوە، توانرا لەلایەن تیمەکانی بەرگریی شارستانی و پۆلیسی دارستان و ژینگە بە هاوکاری خەڵکی ناوچەکە کۆنترۆڵی بکەن.

بەهۆی ئاگرکەوتنەوەکەوە 20 دۆنم پووش و پاوان و دارستانی سرووشتی سووتان، هێشتا هۆکاری ئاگرکەوتنەوەکە دیار نییە، لێکۆڵینەوە لەوبارەیەوە دەستیپێکردووە.