ڕێککەوتن لە کۆتایی نزیکە؛ تەیف سامی تا ئێستا بڕیاری لە ناردنی مووچە نەداوە

ئاڤا نیوز

ڕێککەوتنی نێوان هەولێر و بەغدا لە قۆناغی کۆتاییدایە و نووسراوی فەرمی بۆ خەرجکردنی مووچەی مانگی شەش ئاراستەی وەزارەتی دارایی عێراق کراوە و چاوەڕوان دەکرێت لەم هەفتەیەدا مووچەی مانگی شەشی فەرمانبەرانی هەرێمی کوردستان خەرج بکرێت.

چیرۆکی سەرەکی: ئەمڕۆ یەکشەممە، محەممەد شیاع سوودانی، سەرۆکوەزیرانی عێراق، نووسراوی فەرمی بۆ خەرجکردنی مووچەی مانگی شەش ئاراستەی وەزارەتی دارایی عێراق کردووە و تەیف سامیش بڕیاری ناردنی پارەی نەداوە، وتوویەتی دەبێت حکومەتی کوردستان هەموو مەرجەکان جێبەجێ بکات ئینجا پارە دەنێرین.


هاوکات، شاندێکی شەش کەسیی هەرێمی کوردستان کە پێکهاتوون لە نوێنەرانی وەزارەتی دارایی و دیوانی چاودێریی دارایی، لە بەغدان بۆ چارەسەرکردنی کێشە هەڵپەسێردراوەکان.

لێدوانی فەرمی: دوو سەرچاوەی باڵا لە وەزارەتی نەوتی عێراق و کۆمپانیای سۆمۆ بە ئاڤایان وت: کێشەی هەناردەکردنەوەی نەوتی هەرێمی کوردستان چارەسەر کراوە و تەنیا چەند ڕێکارێکی کارگێڕی ماوە بۆ دەستپێکردنەوەی پرۆسەکە لە نزیکترین کاتدا.

حکومەتی هەرێمی کوردستان ڕەزامەندی نیشانداوە کە مانگانە ڕێژەی 50%ـی داهاتەکانی گومرگ و دەروازە سنوورییەکان و فڕۆکەخانەکان، ڕادەستی بەغدا بکات.

خاڵی ناکۆک: خاڵی سەرەکیی ناکۆکیی نێوان هەردوولا لە ئێستادا لەسەر داهاتی ناوخۆیی باج و ڕسوماتە. حکومەتی عێراق داوای 100% ئەو داهاتانە دەکات، بەڵام حکومەتی هەرێم ئەمە ڕەتدەکاتەوە و پێی وایە بەپێی یاسای بودجە، تەواوی ئەو داهاتانە مافی خۆیەتی بۆ بەڕێوەبردنی کاروباری وەزارەت و فەرمانگەکان و خەرجیی پڕۆژەکان.

ئەوەی پێویستە بیزانیت: بەپێی ئامارەکان، حکومەتی هەرێمی کوردستان مانگانە پێویستی بە 230 ملیار دینار هەیە بۆ خەرجییەکانی بەکاربردن و پڕۆژەکان.

لەلایەکی دیکەوە: ڕێباز حەملان، یاریدەدەری سەرۆکوەزیرانی کوردستان، پشتڕاستی کردەوە کە پرسی نەوت و داهاتی گومرگی یەکلایی کراوەتەوە و گفتوگۆکان لەسەر پرسی باج و ڕسومات بەردەوامن. بڕیارە لەم هەفتەیەدا مووچەی مانگی شەش دابەش بکرێت.