فایلی خەڵك؛ کۆبوونەوەی زبڵ و خاشاک لە بەحرکە نیگەرانی دروست دەکات، شارەوانیش بەڵێنی چارەسەر دەدات

ئاڤا نیوز

دانیشتووانی بەحرکە لە هەولێر بەهۆی کۆنەکردنەوەی زبڵ و خاشاک نیگەرانن و سەرۆکی شارەوانیش کێشەکە دەگەڕێنێتەوە بۆ کێشەی دارایی کۆمپانیای کۆکردنەوەی زبڵ و خاشاک.

چیرۆکی سەرەکی: دانیشتووانی شارۆچکەی بەحرکە، ماوەی زیاتر لە 10 ڕۆژە، بەهۆی کۆنەکردنەوەی زبڵ و خاشاکی ماڵەکانیانەوە گلەیی و ناڕەزایەتی دەردەبڕن. ئەم دۆخە ژینگەیەکی ناتەندروست و بۆنێکی ناخۆشی دروست کردووە، بەتایبەتی لە گەڕەکەکانی وەک ئازادی.

لێدوانی فەرمی: ڕەشید کۆچەر، یەکێک لە دانیشتووانی گەڕەکی ئازادی لە قەزای بەحرکە، بە ئاڤای ڕاگەیاند: "زیاتر لە 10 ڕۆژە ئۆتۆمبێلی کۆکردنەوەی زبڵ و خاشاکی ماڵان نەهاتووەتە گەڕەکەکەمان، زبڵێکی زۆر لە بەردەم ماڵان کۆکراوەتەوە و دۆخەکە گەیشتووەتە ڕادەیەک کە لەبەر بۆنەکەی ناتوانین بۆ چەند خولەکێکی کەم لەبەردەم ماڵەکەمان بوەستین."

بۆچوونی لایەنی بەرامبەر: مەموند عەبدولوەهاب، سەرۆکی شارەوانیی بەحرکە، لە لێدوانێکدا بۆ ئاڤا، هۆکاری ئەم کێشەیەی گەڕاندەوە بۆ کێشەی دارایی کۆمپانیای کۆکردنەوەی زبڵ و خاشاک، هەروەها لەکارکەوتنی بەشێک لە ئۆتۆمبێلەکانیان.

زانیاریی زیاتر: سەرۆکی شارەوانی بەحرکە بەڵێنی دا کە لە سبەینێ پێنجشەممەوە دۆخەکە ئاسایی دەکرێتەوە و وتی، "یەک عەلاگەی زبڵ لە بەردەم ماڵان نامێنێت. تەواوی گەڕەکەکان پاک دەکرێنەوە."