وەزیری وزەی تورکیا: عێراق پێی وتووین لە پرسی نەوت لەگەڵ هەرێمی کوردستان لە ڕێککەوتن نزیکن

ئاڤا نیوز

جێگری وەزیری وزەی تورکیا، خواستی تورکیای بۆ دەستپێکردنەوەی هەناردەی نەوتی بۆڕی کەرکووک- جەیهان دەربڕی و دەڵێت: ئێمە لە نزیکەوە چاودێری دۆخەکە دەکەین و لەگەڵ عێراق لەسەر ئەم پرسە لە پەیوەندیداین، هاوکات ئەوانیش پێمان دەڵێن کە دانووستان لەگەڵ کۆمپانیا نێودەوڵەتییە نەوتییەکان و حکومەتی هەرێمی کوردستان نزیکە لە تەواوبوون.

لێدوانی فەرمی: ئەحمەد بەرات، جێگری وەزیری وزەی تورکیا دەڵێت، "تورکیا هەوڵێکی جددی دەدات بۆ ئەوەی دووبارە هێڵی بۆڕی نەوتی کەرکوک-جەیهان بکاتەوە، ئەوەی لەدەستمان بێت کردوومانە بۆ کردنەوەی هێڵەکە، ئیشاڵڵا بەم زووانە ئەو هێڵە نەوتییە دەکرێتەوە و بە قەبارەیەکی گەورەتر و چالاکتر هەناردەی نەوت دەست پێدەکەینەوە".

زانیاریی زیاتر: ئەم قسانەی ئەحمەد بەرات، لە میانی بەشداری شاندی تورکیا بوو لە کۆڕبەندی وزە لە بەغدا. بۆیە ئەمانەشی وت:

- بۆری نەوتی کەرکوک-جەیهانمان لە حەفتاکانی سەدەی ڕابردووەوە کاردەکات. لەم دواییانەدا دەستپێکردنەوەی هەناردەی نەوت لە بەرنامەی کاردا بووە.

-  ئێمە لە نزیکەوە چاودێری دۆخەکە دەکەین و لەگەڵ عێراق لەسەر ئەم پرسە لە پەیوەندیداین، ئەوانیش پێمان دەڵێن کە دانووستان لەگەڵ کۆمپانیا نێودەوڵەتییە نەوتییەکان و حکومەتی هەرێم و حکومەتی ناوەند نزیکە لە تەواوبوون.

- بەهیوای ئەوەی کە ئەم کێشانە چارەسەر بکرێن، پێشبینی دەکەین ئەم بۆرییە بە زۆرترین توانا بەکاربهێنرێت.

- پەیوەندییەکانمان لە بارەی وزە لەگەڵ عێراق زیاتر بەرەوپێش دەچێت، پرسی ڕێککەوتنی نوێی نەوت لە نێوان عێراق و تورکیا هەیە، دەمانەوێت بە فەرمی کاری هاوبەش کار لەسەر ڕێککەوتنەکە بکەین. 

-دەکرێت هێڵی بۆری عێراق و تورکیا لە ڕوانگەیەکی جیاوازەوە پەرەی پێبدرێت.

-پەیوەندییەکانی تورکیا و عێراق وەک گازی سروشتی، کارەبا، پلانی بۆ دانراوە، هەروەها پڕۆژەی ڕێگای گەشەپێدانیش وەک ڕێڕەوێکی وزە داڕێژراوە، هەروەها دانووستان لەگەڵ عێراق دەکەین بۆ پەرەپێدانی پەیوەندییەکانی وزە لە ڕوانگەیەکی زۆر فراوانترەوە.