بانکێک لە پڕۆژەی هەژماری من دوور خرایەوە

ئاڤا نیوز

بانکی پەرەپێدانی نێودەوڵەتی (IDB) بە فەرمی لەلایەن وەزارەتی دارایی هەرێمی كوردستانەوە ئاگادار كراوەتەوە كە چیتر بەشێك نابن لە هەژماری من، بەهۆی ئەوەی لەلایەن ئەمریكاوە مامەڵەی دۆلاری لێ قەدەغە كراوە.

ڕاگەیێنراوی فەرمی: وەزارەتی دارایی هەرێمی كوردستان سەبارەت بە دوورخستنەوەی بانکی پەرەپێدانی نێودەوڵەتی ئاماژەی بەوە داوە كە بانكەكە لەمەودوا بەشێک نابێت لە پڕۆژەی هەژماری من بەهۆی سنووردارکردنی خزمەتگوزارییە بانکییەکانی بانکی ناوبراو لەلایەن بانکی ناوەندی عێراق لەڕووی مامەڵەکردن بە دۆلار.

وەزارەتی دارایی ڕاشیگەیاند: ئەو مووچەخۆرانەی حکومەتی هەرێمی کوردستان کە ئێستا لە بانکی پەرەپێدانی نێودەوڵەتی (IDB) تۆمارکراون، لە ڕێگەی سەنتەری خزمەتگوزاری پڕۆژەی هەژماری من پەیوەندییان پێوە دەکرێت و ئاگاداردەکرێنەوە لەبارەی گواستنەوەی هەژمارەکانییان بۆ یەکێک لە بانکەکانی دیکەی ناو پڕۆژەکە.

پڕۆژەی هەژماری من بەردەوام دەبێت لە کارکردن لەگەڵ حەوت لە بانکە هاوبەش و ڕێگەپێدراوەکان کە تەواو پابەندن بە ڕێنمایی و پێوەرەکانی بانکی ناوەندی عێراقی و توانای مامەڵەکردنیان بە دۆلار هەیە، کە ئەمەش ڕێگە بە سوودمەندانی پڕۆژەی هەژماری من دەدات لەوەی کارتە بانکییەکانیان لە ناوەوە و دەرەوەی عێراق بەکاربهێنن.

زانیاریی زیاتر: وەزارەتی دارایی دووپاتی دەکاتەوە، هەر بانكێك بە ڕێنماییەكان پابەند نەبێت و ئەركی خۆی بە تەواوی جێبەجێ نەكات لە هەژماری من دوور دەخرێتەوە. ئاماژەی بەوەش دا كە لە گفتوگۆدان بۆ ئەوەی بانكی دیكە بهێننە نێو پڕۆژەی هەژماری منەوە.

باكگراوند: لە مانگی شوباتی ساڵی 2023، مەسروور بارزانی، سەرۆکی حکومەتی هەرێمی کوردستان، پڕۆژەی (هەژماری من)ـی ڕاگەیاند وەک بەشێک لە دیدگا و ستراتیژی هەرێمی کوردستان بۆ فراوانکردنی گشتگیری دارایی و کەمکردنەوەی پشتبەستن بە پارەی نەختینە (کاش). شایانی باسە لە ئێستادا زیاتر لە 900,000 مووچەخۆری حکومی خۆیان تۆمارکردووە لە پڕۆژەی هەژماری من.