ئاڤای خەڵك؛ گەڕەکی هوانە لە سلێمانی خزمەتگوزاریی خراپ و ژینگەیەکی پیسی هەیە

ئاڤا نیوز

دانیشتووانی گەڕەکی هوانە لە سلێمانی، بەدەست چەندین کێشەی ژینگەیی و خزمەتگوزارییەوە دەناڵێنن. ئەم کێشانە ژیانی ڕۆژانەیان تێکداوە و نیگەرانییەکی زۆریان دروست کردووە.

چیرۆکی سەرەکی: یەکێک لە کێشە سەرەکییەکانی گەڕەکی هوانە نەبوون یان خراپیی خزمەتگوزارییە گشتییەکانە. دانیشتووانی هوانە ئاماژە بەوە دەکەن کە ئاوی خواردنەوە و شەقام و شۆستەی گونجاویان نییە، ئەمەش ژیانی قورستر کردوون.

هاوکات فڕێدان و سووتاندنی خۆڵ و خاشاکی گەڕەکەکانی دیکەی سلێمانییە لە نزیک ماڵەکانیان، کێشەیەکی دیکەیە. ئەمەش بووەتە هۆی بڵاوبوونەوەی بۆنی ناخۆش و دووکەڵێکی چڕ، بەتایبەت لە وەرزی هاوین و زستاندا.

زانیاریی بەدەستهاتوو: زەینەب عەبدولعومەر، یەکێک لە دانیشتووانی گەڕەکەکە، بە ئاڤای ڕاگەیاند: "ئەم هاوینە شێت بووین، تەنانەت لە ژوورەوەش ژیانمان نەماوە. کاتێک ئیش بە موبەریدە دەکەین، بەس دووکەڵ و بۆنی ناخۆش دێتە ژوورەوە."

لەلایەکی دیکەوە: جگە لە خۆڵ و خاشاکی سلێمانی، بوونی دەیان کارگەی پیشەسازی لە ناحیەی تانجەڕۆ کێشەکەی قووڵتر کردووەتەوە، چونکە ئەو کارگانەش پاشماوەی پیسیان هەیە و کاریگەریی نەرێنییان لەسەر ژینگە و تەندروستیی خەڵکەکە هەیە. دانیشتووان باس لەوە دەکەن کە بەهۆی ئەم پیسبوونە ژینگەییەوە، ڕێژەی تووشبوون بە نەخۆشی و شێرپەنجە لە ناوچەکەدا بەرز بووەتەوە.

لێدوانی فەرمی: شارەوانی سلێمانی بە ئاڤای وت،  تاکە چارەسەر کارگەی ڕیسایکلینە کە نزیکەی ساڵێکە دامەزراوە. بەڵام دانیشتووان دەڵێن کارگەکە هەموو خۆڵ و خاشاکەکە وەرناگرێت و تەنیا ئەو بەشانە وەردەگرێت کە دەتوانرێت بەکاربهێنرێنەوە.

لەسەر پرسی دابینکردنی خزمەتگوزاریش، شارەوانی سلێمانی وتی، ئەمە پەیوەستە بە دابینکردنی بودجەوە و لە ئێستادا پارەی پێویست نییە بۆ دابینکردنی خزمەتگوزاری بۆ گەڕەکە.