وەزارەتی دارایی میكانیزمێك بۆ خەرجكردنی شایشتە داراییەكانی بەڵێندەران دادەنێت

ئاڤا نیوز

 

وەزیری دارایی و ئابووریی هەرێمی كوردستان بڕیاری دانانی ڕێككار و میكانیزمێك بۆ خەرجكردنی بەشێك لە شایشتە داراییەكانی بەڵێندەران دەدات.

 

وێنە گەورەكە: ڕۆژی سێشەممە 9-9-2025، ئاوات شێخ جەناب، وەزیری دارایی و ئابووری پێشوازی کرد لە شاندێکی یەکێتیی بەڵێندەرانی کوردستان کە پێکهاتبوون لە سەرۆک و بەشێک لە ئەندامانی لقی سلێمانی یەکێتییەکە.

 

ڕاگەیێنراوی فەرمی: وەزارەتی دارایی ڕایگەیاند: لە دیدارێکدا گفتوگۆ لەسەر کێشە و گرفتەکانی بەڵێندەران و شایستەی دارایی کۆمپانیاکان بەگشتی کرا، بەرپرسانی یەکێتییی بەڵێندەران چەند داواکاریەکیان خستەڕوو کە خۆی لە گەڕانەوەی بارمتەی کۆمپانیاکان و خەرجکردنی شایستەکانیان دەبینییەوە.

 

زانیاریی زیاتر: بەپێی ڕاگەیێنراوەكەی وەزارەتی دارایی، وەزیری دارایی پشتیوانیی خۆی بۆ داواکاریەکانیان دووپات کردەوە و دوای گفتوگۆ و پەیوەندیکردن لەگەڵ بانکی ناوەندی هەرێم / سلێمانی بڕیار درا بۆ ڕێکخستنی کۆبوونەوەیەک بەمەبەستی دانانی ڕێکار و میکانیزمی گونجاوی مانگانە بۆ  خەرجکردنی بەشێک لە شایستە داراییەکانیان بەشێوەیەکی بەردەوام.