بڕی 30 ملیار دینار بۆ چارەسەری کێشەی کەمی دەرمان لە سلێمانی دابین دەکرێت

ئاڤا نیوز

کێشەی کەمی دەرمان و پێداویستی پزیشکی لە سلێمانی چارەسەر دەکرێت و تاوەکو کۆتایی ئەمساڵ زیاتر لە 30 ملیار دیناری بۆ تەرخان دەکرێت.

چیرۆکی سەرەکی: کەمی دەرمان و پێداویستییە پزیشکییەکان لە سلێمانی مەترسی لەسەر ژیانی کەسانی نەخۆش دروست کردووە، خاوەن کۆمپانیاکانی هێنانی دەرمان و پێداویستی، بەهۆی وەرنەگرتنی پارە ناتوانن دەرمان هاوردە بکەن.

لێدوانی فەرمی: د .سامان بەرزنجی، وەزیری تەندروستی حکومەتی هەرێمی کوردستان بە ئاڤای ڕاگەیاندووە، کێشەکە بۆ تەرخانکراوی دارایی دەگەڕێتەوە و بەهۆی قەیرانی ئابوورییەوە کێشەی نەختینە لە بانکەکان دروستبووە، لە کۆی 27 ملیار دینار تەنیا چوار ملیار دینار خەرج کراوە. 

گوتیشی لە سێ مانگی داهاتووی ئەمساڵیش کێشەی کەمی دەرمان نابێت و ئەگەر پارەی پێوست خەرج بکریت، لەم دوو ڕۆژەدا دەست بە نەشتەرگەرییەکان دەکرێتەوە.

زانیاریی تایبەت: سەرچاوەیەک لە بانکی هەرێم لقی سلێمانی بە ئاڤای گوت"  تاوەکو کۆتایی ئەمساڵی بڕی 30 ملیار دینار بۆ تەندرستی سلێمانی خەرج دەکەین، ئەگەر پێداویستی زیاتریشیان هەبێت بۆیان دابین دەکەین.

لەلایەکی دیکەوە: د.سەرخێڵ ئازاد، جێگری بەڕێوەبەری تەندروستی سلێمانیش دەڵێت: "چەکی پارە کراوە، بەڵام بانکی بازرگانی هەرێم دەبێت فەرمانی خەرجکردنی چەکەکان بدات، بە خەرجکردنی پارەکەش بەشێکی زۆر لە گرفتەکان چارەسەر دەبن و ئەگەر پارەکە خەرج بکرێت و کۆمپانیاکان دەرمان پێداویستییە دەرمان و پێسداویستییە پزیشکییەکانمان  بۆ بێنن، ئەوا لەم دوو ڕۆژەدا دەست بە نەشتەرگەری دەکرێتەوە.