ڕوانگەی سوری بۆ ئاڤا زانیاریی لەبارەی هێرشەكەی دیمەشق ئاشكرادەكات

ئاڤا نیوز 

بەڕێوەبەری ڕوانگەی سووری بۆ مافەكانی مرۆڤ ئاشكرایكرد، لە بۆردوومانەکەی ئیسرائیل بۆ سەر باڵیۆزخانەی ئێران، فەرماندەی سوپای قودس و حەوت راوێژکاری ئێرانی کوژراون.

لێدوانی فەرمی: ڕامی عەبدولرەحمان، بەڕێوەبەری ڕوانگەی سووری بۆ مافەكانی مرۆڤ، هەواڵی بۆردوومانەکەی بۆ ئاڤا پشتراستکردەوە و گوتی: بۆردوومانەکە بۆ سەر باڵیۆزخانەی ئێران بووە لە شارۆچكەی مێززە لە دیمەشقی پایتەخت .

زانیاریی زیاتر: بە گوێرەی زانیارییە سەرەتاییەکان،  فەرماندەی سوپای قودس لە سووریا و لوبنان لەگەڵ حەوت راوێژکار و دیپلۆماتكاری ئێرانی کراونەتە ئامانج.

ئەمەش بزانە: ئامانج لە هێرشەکە کوشتنی محەمەد رەزای زاهیدی فەرماندەی فەیلەقی قودسی سوریا و لوبنان بووە. ڕامی عەبدولڕەحمان وای گوت.

لەلایەکی دیکەوە: ئێران پشتڕاستی دەکاتەوە کە باڵیۆزخانەکەی لە دیمەشق بە شەش مووشەک کە لە لایەن فڕۆکەی جەنگیی ئێف 35ەوە هەڵدرابوون، کراوەتە ئامانج.

باکگراوند: لە سەرەتای ساڵی 2024 وە، 30 جار ئیسرائیل خاکی سوریای کردووەتە ئامانج کە 22 لەو هێرشانە ئاسمانی و هەشتیان وشکانی بوون.