پارێزگاری دهۆک: دهۆک سەوزترین پارێزگای عێراقە

ئاڤا نیوز

سەرۆکوەزیران مەسرور بارزانی پارکی سەرهەڵدانی لە ڕۆژهەڵاتی شاری دهۆک کردەوە، پارێزگاری دهۆکیش جەخت لەوە دەکاتەوە کە دهۆک سەوزترین پارێزگایە لە عێراق و ڕووبەری سەوزایی یەک ملیۆن مەتری تێپەڕاندووە.

وێنە گەورەکە: کابینەی نۆیەمی حکومەتی هەرێمی کوردستان، بەڕژدی کار لەسەر زیادکردنی ڕێژەی سەوزایی لەچوارچێوەی ڕووبەڕووبوونەوەی گۆڕانکارییەکانی ئاو و هەوا، لەشار و شارۆچکەکان جێبەجێکردووە، ئەمڕۆ پارکی سەرهەڵدان لە شاری دهۆک کرایەوە، کە زیاتر لە 50 هەزار داری تێدا چێنراوە، ڕێژەی سەوزایی شارەکەی لە 14% گەیاندووەتەوە 20%.

لێدوانی فەرمی: عەلی تەتەر، پارێزگاری دهۆک، گوتی "ڕووبەری سەوزایی لە پارێزگای دهۆک ملیۆنێک و 624 هەزار مەترە، لەماوەی داهاتووش پارکی ئالوکا کە گەورەترین پارکە لەسەر ئاستی عێراق تەواو دەکرێت."

زانیاریی زیاتر: پارێزگاری دهۆک لە درێژەی وتارەکەیدا ئەمەشی گوت، "لەماوەی 50 ساڵی تەمەنی پارێزگای دهۆکدا هەزار و 400 شەقام و کۆڵان دروستکراوە، تەنیا لەماوەی کابینەی نۆیەم 900 پڕۆژەی شەقام و ڕێگای نوێ بۆ ناو دهۆک جێبەجێکراوە."

ئەمەش بزانە: پارکی سەر‌هەڵدان لەسەر ڕووبەری 48 دۆنم دروستکراوە، بەدیاریکراوی ڕووبەری پرۆژەکە 115 هەزار مەتردووجایە، تێچووی دروستکردنەکەی چوار ملیار و 183 ملیۆن و 278 هەزار دینارە.