عێراق داوای 120 ملیار دینار داهاتی نانەوتی بۆ مانگی حەوت لە کوردستان دەکات

ئاڤا نیوز

 

بەگوێرەی زانیارییەکانی ئاڤا، ئەنجوومەنی وەزیرانی عێراق دوای بڕیاری خەرجکردنی مووچەی مانگی حەوت، ئێستا داوای 120 ملیار دینار داهاتی نانەوتی بۆ ئەم مانگە لە هەرێمی کوردستان دەکات.

 

وێنە گەورەکە: هەولێر و بەغدا نزیکن لە ڕێککەوتن لەسەر داهاتی نانەوتی و دوای ئەوەی ڕێککەوتنی سێ قۆڵی( لەنێوان هەولێر- بەغدا- کۆمپانیاکانی نەوت) دەربارەی دەستپێکردنەوەی هەناردەی نەوت کرا، ئێستا ڕێککارەکانی ناردنی مووچەی مانگی حەوت لە بەغداوە دەستپێدەکەن.

 

زانیاریی تایبەت: سەرچاوەیەک لە ئەنجوومەنی وەزیرانی عێراق بە ئاڤای گوت، " لە کۆبوونەوەکەی ئەمڕۆیدا، ئەنجوومەنی وەزیرانی عێراق بڕیاری داوە کە دەبێت هەرێمی کوردستان 120 ملیار دینار داهاتی نانەوتی مانگی حەوت ڕادەست بکات."

 

بۆچوونی لایەنی بەرامبەر: سەرچاوەیەک لە وەزارەتی دارایی و ئابووریی هەرێمی کوردستان بە ئاڤای ڕاگەیاند، "داهاتی نانەوتی مانگی حەوت ئامادەیە، هەر کات نووسراوی خەرجکردنی مووچەی مانگی حەوت گەیشت پارەکە بۆ بەغدا دەنێرین."