وادەی ناردنی پارە و دابەشکردنی مووچە

ئاڤا نیوز

 

بەگوێرەی زانیارییەکانی ئاڤا سبەی سێشەممە دەست بە خەرجکردنی ڕێککارەکانی ناردنی مووچەی مانگی حەوت دەکرێت و هەفتەی داهاتوو بەغدا پارەی مووچەی مانگی حەوت دەخاتە سەر هەژماری وەزارەتی دارایی کوردستان.

 

چیرۆکی سەرەکی: ئەمڕۆ سێشەممە کۆبوونەوەی ئەنجوومەنی وەزیرانی عێراق بەڕێوەچوو، محەممەد شیاع سوودانی، سەرۆکوەزیرانی عێراق خۆی سەرپەرشتی کۆبوونەوەکەی کرد، تیایدا بڕیار درا مووچەی مانگی حەوتی مووچەخۆرانی هەرێمی کوردستان خەرج بکرێت.

هاوکات خەرجکردنی مووچە هاوشێوەی دوو مانگی ڕابردوو لە بەرامبەر ناردنی 120 ملیار دینار داهاتی نانەوتییە.

 

زانیاریی تایبەت: ئاڤا زانیویەتی ناردنی پارە بۆ مووچەی مانگی حەوت دەکەوێتە هەفتەی داهاتوو، بەجۆرێک سێشەممە یان چوارشەممەی داهاتوو پارە دەگات و دواتر خشتەی دابەشکردنی مووچە بڵاو دەکرێتەوە و دەست بە دابەشکردنی دەکرێت. 

لەلایەکی دیکە: وەزارەتی دارایی کوردستانیش داهاتی نانەوتی کۆکردووەتەوە، تەنانەت زیاتر لە 120 ملیار دیناری ئامادەیە، تەنها نووسراوی ناردنی پێویستە دواتر بە کاش بە لقی هەولێری بانقی ناوەندی دەدرێت.

 

- سەرچاوەیەک لقی هەولێری بانکی ناوەندیی عێراق بە ئاڤایان گوت:  پارەی پێویستیان بۆ مووچە لەبەردەستە، تەنانەت ئێستا زیاتر لە سێ ترلیۆن دینار پارەی کاشیان هەیە، ئەمەش بەشی مووچەی سێ مانگی مووچەخۆرانی کوردستان دەکات. 

لەبارەی دابەشکردنی مووچەش ئاڤا قسەی لەگەڵ وەزارەتی دارای کوردستان کرد، گوتیان لیستی مووچە ئامادەیە و هاوشێوەی مانگەکانی ڕابردووە، لەگەڵ گەیشتنی پارە خشتەی مووچە بڵاو دەکەنەوە و لە ماوەی دوو بۆ سێ ڕۆژدا مووچەی سەرجەم مووچەخۆران دابەش دەکرێت.

 

ئەمەش بزانە: بڕیاری جەرجکردنی مووچەی مانگی حەوتی مووچەخۆرانی هەرێمی کوردستان لەکاتێکدایە، عێراق خۆی دەستیکردووە بە دابەشکردنی مووچەی مانگی نۆی فەرمانبەران.