ڕاوێژکارێک: عێراق بە پشتبەستن بە وزەی پاک ڕۆژانە 250 هەزار بەرمیل نەوتی بۆ دەگەڕێتەوە

ئاڤا نیوز

عێراق پلانی هەیە بۆ کەمکردنەوەی بەکارهێنانی نەوت لە ناوخۆدا زیاتر پشت بە وزەی پاک ببەستێت و بەمەش دەتوانێت ئەو بڕەی دەمێنێتەوە هەناردەی بکات.

بۆچی گرنگە؟: بە پەنابردنە بەر وزەی پاک، عێراق دەتوانێت ئەم بڕە نەوتە هەناردە بکات کە بۆ بەرهەمهێنانی کارەبا و پێداویستی ناوخۆ بەکاری بهێنێت، بەمەش داهاتێکی زۆر بۆ عێراق دەگەڕێنێتەوە و باری ئابووری وڵات باشتر دەکات.

لێدوانی فەرمی: عەبدولباقی خەلەف، ڕاوێژکاری وەزارەتی نەوت بە ئاژانسی هەواڵی عێراقی ڕاگەیاند، عێراق ڕۆژانە نزیکەی 250 هەزار بەرمیل نەوت بۆ بەرهەمهێنانی کارەبا و پێداویستی ناوخۆ بەکاردەهێنێت. هێنانی وزەی نوێبووەوە، هەنگاوێکی گرنگە. بەڵام ئەمە بە واتای ئەوە نایەت عێراق بە تەواوی واز لە نەوت و گاز بهێنێت. بەڵکو وزەی نوێبووەوە وەک یارمەتیدەرێکە بۆ وزەی ئێستا، نەک شوێنگرەوەی تەواو. عێراق هێشتا پشت بە نەوت دەبەستێت بۆ سەرچاوەی سەرەکی داهاتی وڵات.

لەلایەکی دیکەوە: سەبارەت بە هەوڵەکانی وەزارەتی نەوت، خەلەف ڕایگەیاند، وەزارەتی نەوت هەوڵی داوە پڕۆژەکانی پاڵاوتنی نەوت زیاد بکات بۆ ئەوەی کەمتر پێویستیان بە هاوردەکردنی بەنزین و زەیتی غاز بێت. ئێستا عێراق زۆربەی پێداویستییەکانی خۆی بۆ ئەم بەرهەمانە دابین دەکات.

لەهەمان کاتدا: وەزارەت خەریکی پڕۆژەی نوێیە بۆ بەرهەمهێنانی بەنزینی کوالێتی بەرزتر، کە ئەمەش هاووڵاتیان سوودی لێ وەردەگرن و پێویستی بە هاوردەکردن کەم دەکاتەوە.