ناتۆ 100 ملیار یۆرۆ هاوکاریی سەربازیی ئۆکراینا دەکات

ئاڤا نیوز

 

لە سەروبەندی 75 ساڵەی دامەزراندنی ناتۆدا، وەزیرانی دەرەوەی وڵاتانی ئەندامی ئەو هاوپەیمانێتییە لە برۆکسێل، کۆدەبنەوەو گفتوگۆ لەسەر دابینکردنی بودجەیەک بۆ هاوکاریکردنی درێژخایەنی سەربازیی ئۆکراینا دەکەن. 

 

وێنە گەورەکە: پڕۆژەی هاوکاریی درێژخایەنی ئۆکراینا لەلایەن یێنس ستۆڵتێنبێرگ، سکرتێری گشتیی ناتۆ، پێشنیاز کراوە و ئەمڕۆ و سبەی گفتوگۆی لەسەر دەکرێت؛ بە گوێرەی پڕۆژەکە وڵاتانی ئەندام بە شێوەیەکی ڕاستەوخۆ چەک و تەقەمەنی و پێداویستیی سەربازی پێشکەش بە ئۆکراینا دەکەن. 

 

لەلایەکی دیکەوە: پڕۆژەیاسایەکی ئەمریکا بۆ هاوکاریکردنی ئۆکراینا بە بەهای 60 ملیار دۆلار لە کۆنگرێسی ئەو وڵاتە ماوەتەوە و تێنەپەڕێنراوە. 

 

ئەوەی پێویستە بیزانیت: کۆبوونەوەی لوتکەی ناتۆ مانگی تەممووز لە واشنتن بەڕێوەدەچێت و لەو کۆبوونەوەیەدا بڕیاری کۆتایی لەسەر پڕۆژەکە دەدرێت.