لە هەولێر کارەکانی دروست کردنی پێنج پارکی گەورە لە تەواو بووندان

ئاڤا نیوز

لە کابینەی نۆیەمی حکومەتی هەرێمی کوردستان گرنگی تایبەت بە ژینگە و سەوزایی دراوە، لەو چوارچێوەیەوە پێنج پارکی گەورە لە هەولێر دروست دەکرێن.

وێنە گەورەکە: لە پێناو زیادکردنی ڕێژەیی سەوزایی و زیاتر پاراستنی ژینگەی شار، لە ناوەندی شاری ھەولێر لە سەر ڕووبەری 200 دۆنم زەوی دەستکراوە بە دروستکردنی پێنج پارکی گەورە، کە تێیدا 40 ھەزار دار دەچێندرێن و ئەمساڵیش هەر پێنج پارکەکە تەواو دەکرێن.

لێدوانی فەرمی: ئومێد خۆشناو، پارێزگاری هەولێر، بە ئاڤای ڕاگەیاند، ئەو پارکانە لە سەنتەری شاری هەولێر دروست دەکرێن، دەبنە هۆی زیادکردنی سەوزایی و خۆشگوزەرانی دانیشتووانی هەولێر و دەوروبەری، پارکەکانیش بەو شێوە دابەشکراوە بەسەر شوێنە جیاوازەکانی هەولێر:

٠ دروستکردنی پارکێک لە نزیک شەقامی 120 مەتری، لەسەر ڕووبەری 80 دۆنم زەویی و نزیکەی هەشت ھەزار داری تێدا دەچێنرێت، لەئێستادا نزیکەی لە 70%ـی کارەکانی تەواو بووە.

٠ دروستکردنی پارکی ڕەشکین لەسەر ڕووبەری 47 دۆنم زەویی و 16 ھەزار داری تێدا دەچێنرێت و لە ئێستادا لە 50%ـی کارەکانی تەواو بووە.

٠ دروستکردنی پارکی گەڕەکی نازدار لە سەر ڕووبەری چوار دۆنم زەویی و شەش ھەزار داری تێدا دەچێنرێت و لە 80%ـی کارەکانی تەواو بووە.

٠ دروستکردنی پارکی گەڕەکی ژیان لەسەر ڕووبەری حەوت دۆنم زەویی و پێنج ھەزار داری تێدا دەچێنرێت، لە 70%ـی کارەکانی تەواو بووە.

٠ پارکی یەکتربڕی شەقامی 150 مەتری کە ڕووبەرەکەی 60 دۆنمە و کارکردن تێیدا بەردەوامە.

لەلایەکی دیکەوە: پڕۆژەی دروستکردنی پشتێنەی سەوزایی هەولێریش دەبێتە زیادکردنی دوو هێندەی سەوزایی ئێستا، ئەمەش دەبێتە هۆی زیاتر پاکبوونەوەی ژینگەی هەولێر.