شاخەوان عەبدوڵڵا: مووچەی مانگەکانی هەشت و نۆ خەرج دەکرێن

ئاڤا نیوز

حکومەتی هەرێمی کوردستان چاوەڕێی خەرجکردنی مووچەیە تاوەکو داهاتی نانەوتی بۆ بەغدا بنێرێت، جێگری سەرۆکی پەرلەمانی عێراقیش دەڵێت: مووچەی مانگەکانی هەشت و نۆ خەرج دەکرێن.

وێنە گەورەکە: دوای هەناردەکردنەوەی نەوتی کوردستان و ڕێککەوتنی نێوان هەولێر و بەغدا بۆ پرسی مووچەی مووچەخۆرانی کوردستان، حکومەتی هەرێم وەک پابەندییەک مانگانە بڕی 120 ملیار دینار داهاتی نانەوتی ڕەوانەی بەغدا دەکات، ئێستا داهاتی نانەوتی ئامادەیە و کوردستان چاوەڕێی خەرجکردنی پارەی مووچەی مانگی هەشتە، بەمەش ڕاستەوخۆ  پارەکە دەداتە بەغدا.

لێدوانی فەرمی: شاخەوان عەبدوڵڵا، جێگری سەرۆکی پەرلەمانی عێراق بە ئاڤای ڕاگەیاند: بۆ مووچەی مانگەکانی هەشت و نۆ کێشە نابێت، بەهەمان ڕێکاری مانگی حەوت دەبێت و مووچەی فەرمانبەران دابەش دەکرێت. ئەو ڕێککەوتنەشی بۆ داهاتی نانەوتی کراوە وەک خۆی جێبەجێ دەکرێت.

زانیاریی زیاتر: بەگوتەی جێگری سەرۆکی پەرلەمانی عێراق، هەناردەکردنەوەی نەوتی هەرێمی کوردستان گرفتەکەی چارەسەر کردووە و سۆمۆ نەوتی کوردستان دەفرۆشێت، بۆیە حکومەتی فیدراڵ مووچەی مووچەخۆرانی کوردستان دەنێرێت و بابەتی مووچە کێشەی تێدا نەماوە.