بەهای هەر بیتکۆینێک گەیشتە 120 هەزار و 671 دۆلار

ئاڤا نیوز

ئەمشەو بیتکۆین ئاستی پێوانەیی نوێی تۆمار کرد و بەهای هەر بیتکۆینێک گەیشتە زیاتر لە 125 هەزار دۆلار، بەرزبوونەوەی بەهاکەیشی بۆ چەند هۆکارێک دەگەڕێتەوە.

چیرۆکیی سەرەکی: ئەمشەو بەهای دراوی ئەلیکترۆنی بیتکۆین ئاستی پێوانەیی نوێی شکاند و بەهای هەر بیتکۆینێک بۆ زیاتر لە 125 هەزار دۆلار بەرزبووەوە.  بەهای کۆی بازاڕی بیتکۆینیش ئێستا بۆ دوو تریلیۆن و 630 ملیار  دۆلار بەرزبووەتەوە.

هۆکارە زانراوەکان: هۆکاری ئەو بەرزبوونەوە بەرچاوە بۆ بەرزبوونەوەی پشکەکان و خواست بۆ وەبەرهێنانە لەو سندووقانەی بە بیتکۆین پاڵپشتی دەکرێن.

هۆکارێکی دیکەش درێژەکێشانی داخرانی حکومەتی ئەمریکایە، کە وەبەرهێنەران ڕوو لە پەناگە ئارامەکان دەکەن لە نێویشیاندا دراوی بیتکۆین.

لێدوانی فەرمی: جیف کیندریک، سەرۆکی بەشی توێژینەوە لە قەواڵە دیجیتاڵییەکان لە بانکی ستاندەرد چارتەر دەڵێت: داخرانی حکومەتی ئەمریکا ئەمجارە جیاوازە لە ساڵانی ڕابردوو بە تایبەت 2018 و 2019، چونکە ئەندامانی کۆنگرێس دوورن لە ڕێککەوتن، ئەوەش وای کردووە نرخی پەناگە ئارامەکان لە دیارترینیشیان زێڕ و بیتکۆین بەشێوەیەکی بەرچاو بەرزببنەوە.

ئەمەش بزانە: بەهای دراوی بیتکۆین بە درێژایی ئەمساڵ لە ئاراستەی بەرزبوونەوە بوو، هۆکاری سەرەکیش تێپەڕاندنی یاسایەکی تایبەت بوو بە دراوە ئەلیکترۆنییەکان لە ئەمریکا، ئەمەش ڕاستەوخۆ پاڵپشتی بۆ دراوە ئەلیکترۆنییەکان دروست کرد.